Мамандардың мәліметінше, маусым айының өзінде Талдықорған қаласында екі бала әртүрлі биіктіктен құлап, ауруханаға жеткізілген. Оның бірі екі жастағы сәби. Жарақат алған бала қазір ауыр хәлде жансақтау бөлімінде жатыр. Өкінішке орай, өткен жылы аймақта дәл осындай алты оқиға орын алған. Негізі мұндай құбылыс әр жылы көктем мен жаз айларында көп кездеседі. Себебі, бұл біріншіден, жазғы уақытта үй терезелерінің ашық қалуы мен қауіпсіздік шараларының толық сақталмауынан болса, екіншіден, балалардың үлкендердің қарауынсыз қалуынан. Өкінішке орай кейбір оқыс оқиғалардың соңы қайғылы істермен аяқталып жатады.
– Мұндай жағдайлардың алдын алу үшін қазір аймақта әр саланың өкілдері бірлесіп ауқымды түсіндіру жұмыстарын жүргізуде. Осы орайда көпқабатты үйлердің терезелеріне арнайы шектеуіштер мен құлыптар орнату, әрі, терезелерді жоғарыдан ашылатын құрылымдарға ауыстыру сынды сақтық шаралары ескертілуде. Сонымен бірге құрылыс компаниялардың жауаптыларымен арнайы кездесулер өткізіліп, жаңадан салынатын баспаналарда заманауи нормаларының қатаң сақталуы талап етілуде, – дейді төтенше жағдайлар саласының басшылары.
Қолға алынған шаралардың аясында бүгінгі күнге дейін аймақтағы төтенше жағдайлар департаменті, жергілікті атқарушы органдар және полиция қызметкерлері бірлесіп 90 көпқабатты тұрғын үйдегі адамдарға түсіндіру жұмыстарын жүргізген. Сондай-ақ, 1100-ден астам пәтер қамтылып, 1600-ден астам тұрғынға жадынама мен брошюралар таратылған. Сонымен бірге, сауда, ойын-сауық орталықтары мен кинотеатрларда, LED-экрандарда балаларды қараусыз қалдыруға болмайтыны туралы бейнебаяндар көрсетіліп, әлеуметтік желілер мен ата-аналар чаттары арқылы да түсіндіру жұмыстары жалғасуда. Осы орайда «Сақтықта қорлық жоқ» деген құтқару саласының мамандары халыққа мынадай қарапайым ережелерді ешқашан естен шығармауды ескертеді.
- Бөлмеде ашық терезе болса, баланы тіпті бір минутқа да қараусыз қалдырмауға.
- Барлық терезеге арнайы құлып немесе шектеуіш орнатыңыз және олардың жұмысқа жарамдылығын тексеруге.
- Терезе маңына жиһаз және бала өрмелеп шыға алатын заттарды қоймауға.
- Маскит торларына сенбеңіз – олар құлаудан қорғай алмайтынын еске салады.
- Балаларға биіктіктен құлаудың қаншалықты қауіпті екенін және үйде қалай қауіпсіз болу керектігін үнемі түсіндіріп отыруға шақырады.
Айдын КӘЛІМХАН
