Еңбек және халықты әлеуметтік қорғау министрлігі 1 маусымды мемлекеттік мереке ретінде белгілеу мүмкін екенін мәлімдеді. Бұл туралы ведомство Мәжіліс депутаты Кенжеғұл Сейтжанның депутаттық сауалына берген жауабында хабарланды.
Депутат не ұсынды?
Кенжеғұл Сейтжан:
«Балалар – ел болашағының негізі. Олардың дамуы мемлекеттік саясаттың басымдығы болуы тиіс. Сол себепті 1 маусымды ресми мереке ретінде атап өту маңызды», – деді.
Сонымен қатар, депутат демалыс күндерін алдын ала жоспарлау үшін жаңа жүйе енгізуді ұсынды. Ол демалыс күндерін екі жыл бұрын бекіту мүмкіндігін қарастыру қажет екенін айтты.
Министрліктің жауабы
-
1 маусымды мемлекеттік мереке ету ұсынысы министрлік тарапынан қолдау тапты:
«Бұл күн ата-аналар мен балаларға бірге уақыт өткізуге жағдай жасайды және отбасылық құндылықтарды нығайтады», – делінген жауапта.
-
Ал демалыс күндерін екі жыл бұрын бекіту ұсынысы қолдау таппады:
«Бұл күнтізбелік және елдегі нақты жағдайларға байланысты жыл сайын жеке қаралады», – деді министр Светлана Жақыпова.
