Биыл Жетісу өңірінде «Мектепке жол» республикалық акциясы аясында әлеуметтік осал топтағы 16650 балаға көмек көрсетіледі. Ол үшін бюджеттен 468 млн. 332 мың теңге бөлініп отыр. Аудандық, қалалық әкімдіктер мен білім бөлімдері, көмекке мұқтаж балалардың тізімі жинақтап, бекітіпті. Бұл жөнінде Б. Құранбек атындағы Журналистер үйінде өткен баспасөз мәслихатында айтылды.
Облыстық білім басқармасы қызметкерлерінің айтуынша, «Мектепке жол» акциясын ұйымдастыру және өткізу бойынша өңірлік іс-шаралар жоспары бекітілген. Оған кәсіпкерлік және индустриялық-инновациялық даму басқармасы, аудандық, қалалық әкімдіктер мен білім бөлімдері толықтай атсалысуы керек. Осы орайда аудан, қаланың орталық және ірі сауда орындарында мектеп тауарларын төмендетілген бағамен сату бойынша қайырымдылық жәрмеңкелері өткізіледі. Осыған байланысты елді мекендер аумағында «Мектепке жол» жалпыреспубликалық акциясын өткізу туралы билбордтар, баннерлер, жарнамалық плакаттар орнатылуда. Қазіргі уақытта облыстық басқармалар мен департаменттерге көмек қажет ететін 138 баланың тізімі жинақталған.
– Алдағы тамыз айы аралығында аз қамтылған, көпбалалы, жетім және ата-анасының қамқорлығынсыз қалған балаларға оқу жылының басталуына даярлық кезінде материалдық қолдау көрсету мақсатында «Мектепке жол» республикалық акциясы ұйымдастырылады. Қазақстан Республикасы Үкіметінің №64 Қаулысы аясында әлеуметтік осал топ отбасыларының 25229-на, яғни 1 балаға 46228 теңге бөлініп отыр. Жалпы балаларды киім-кешек, кеңсе тауарларымен қамту мақсатында жергілікті бюджеттен 1 млрд. 166 млн. 286 мың теңге қаражат бөлінді. Әрбір азамат халықтың әлеуметтік осал топтарынан шыққан балаларды мектепке даярлауға атаулы көмек көрсетуде азаматтық белсенділік танытып, әрбір балаға шынайы қамқорлық пен назар аудару туралы әлеуметтік желілерде халықты ақпараттандыру мақсатында хабарландырулар бердік, – дейді облыстық білім басқармасы басшысының орынбасары Қайрат Қасымов.
Бүгінгі күнге Ақсу, Көксу, Кербұлақ аудандарының әлеуметтік осал топтағы балаларын қамту үшін ата-аналардың жеке есеп шотына жергілікті бюджеттен 100% аударым жасалыпты. Білім басқарамасы мамандарының айтуынша, қалған қала, аудандарды қамту 15 тамызға дейін толық аяқтау жоспарлануда.
Медет ЖҰМАБАЙ
