– Сіздер мемлекет саясатын елге түсіндіріп, қоғам мен биліктің арасында көпір болып келесіздер. Елімізде жасалып жатқан реформалардың мән-мағынасын жұртшылыққа жеткізіп жүрсіздер. Бұл – өте маңызды, күрделі, ерекше жұмыс. Әрбір адамның қолынан келмейді. Мен бүгін бәріңізге шынайы ризашылығымды білдіремін, – деген Мемлекет басшысының айтуынша, биылғы 5 айда ұлттық экономика 6 пайызға өсіп, өңдеу өнеркәсібінің деңгейі 6 пайызға жуықтады. Жалпы соңғы 5 жылда еліміздің ішкі жалпы өнімі 182-ден 286 миллиард долларға жеткен.
Халықтың санасын өсіру жолында тілшілер қауымының қосар үлесін салмақтаған Президент озық ойлы ұлт болу, көшбасшы елдердің қатарына қосылу қажеттігін алға тартып, билік те, баспасөз де ел игілігіне қызмет ететінін жеткізді. Сол жолда артылар жауапкершілік жүгінің жеңіл еместігін ұғындырған Қасым-Жомарт Кемелұлы қазіргідей ақпарат тасқынында сенімді дерек, дәйекті талдау ұсынудың, мәселені ұлт мүддесі тұрғысынан саралаудың маңыздылығына баса назар аудартты. Сондай-ақ, кездесуге Сауық Жақанова, Жарылқап Бейсенбайұлы, Шархан Қазығұл сынды ақпарат саласының ардагерлері арнайы шақырылғанын атап өткен Мемлекет басшысы алдыңғы аға буынға ризашылық білдірді.
Жыл сайынғы дәстүрге сай журналистерге Президент сыйлығы мен гранттарын тапсырып, алғысын жариялаған Қасым-Жомарт Тоқаеав медиа саласының өкілдерін мемлекеттік наградамен марапаттады.
Жиында ардагер журналист Шархан Қазығұл, «Казахстанская правда» газетінің бөлім меңгерушісі Юлия Магер және «Хабар» телеарнасының жүргізушісі Гүлнәзия Зарипова сөз сөйледі.
Жоғарғы сот төрағасын қабылдады
Мемлекет басшысына биылғы 5 айдағы жұмысын таныстырған Асламбек Мерғалиев былтырмен салыстырғанда сот органдарына түскен талап-арыз бен шағымның 18,1 пайызға ұлғайғанын, сол арқылы сот жүйесіне сенім артқанын атап өтті.
Жоғарғы сот төрағасы қылмыстық процесс кезінде тұлғаның конституциялық құқықтары мен бостандығын қамтамасыз ету жөнінде баяндап, мемлекет басшысының тапсырмасына сәйкес Қылмыстық және Қылмыстық-процестік кодекстерге ревизия жасалғанын, азаматтар мен кәсіпкерлердің құқықтарын күшейтуді, тараптардың жарыспалылығы мен тең құқылығын нығайтуды, қылмыстық процесті оңтайландырып, бюрократиядан арылтуды көздейтін жаңа заң жобасы әзірленгенін жеткізді.
Кездесу соңында судьялар мен сот қызметкерлерін кәсіби мерекелерімен құттықтаған Президент Қасым-Жомарт Тоқаев заң үстемдігін қамтамасыз етіп, сот төрелігінің сапасын арттыру, сондай-ақ, судьялардың тәуелсіздігі мен жауапкершілігін күшейту мақсатында сот жүйесін одан әрі жетілдіру маңызды екеніне назар аудартты.
«Айбын» жиынын ашты
Президент – Қазақстан Қарулы Күштерінің Жоғарғы Бас қолбасшысы Қасым-Жомарт Тоқаев XI халықаралық «Айбын» әскери-патриоттық жастар жиынының ашылу рәсіміне қатысты.
Қазақстан, Әзірбайжан, Беларусь, Қырғызстан, Ресей және Өзбекстан елдерінің әскери-патриоттық қозғалыстарына мүше 800-ге жуық жастың басын қосқан іс-шара Ақтөбе облысында ұйымдастырылып отыр. Слет қос атаулы датаға – Ұлы Жеңістің 80 жылдығына және қазақ халқының батыр қызы Әлия Молдағұлованың 100 жылдық мерейтойына арналады.
Қасым-Жомарт Тоқаев барша қатысушыларды «Айбын» әскери-патриоттық жастар жиынының ашылуымен құттықтап, бұл жас өрендеріміздің рухын шыңдайтын өте маңызды іс-шара екеніне назар аудартты.
