2025 жылғы көктемгі маусымда Қазақстанда картоп тапшылығы болмайды. Бұл туралы Ауыл шаруашылығы министрі Айдарбек Сапаров Үкімет отырысынан кейінгі брифингте мәлімдеді, деп хабарлайды 7-su.kz ақпараттық порталы.
Министрдің айтуынша, былтырғы жылы картоп өнімділігі жоғары болғанымен, ішкі нарықта кейбір қиындықтар туындаған. Соған байланысты биылғы жылы тиісті шаралар қабылданып жатыр.
«Жалпы былтыр картоптың шығымы жақсы болды. 600 мың тоннаға жуығы экспортталды. Ал импорт – небәрі 60 мың тонна. Осы жағдайларды ескеріп, биыл картоп егілетін алқапты 9 мың гектарға ұлғайтып жатырмыз. Сондықтан биыл тапшылық болмайды деп ойлаймын», – деді министр.
Сақтау қоймалары салынып жатыр
Министр картопты сақтау инфрақұрылымына да тоқталды. Қазір арнайы жол картасы аясында сақтау орындары салынып, кәсіпкерлерге 2,5 пайыздық несиемен қойма тұрғызуға мүмкіндік берілуде.
«Егер жеке кәсіпкер өнімін сақтай алмай жатса, бізге хабарласа алады. Министрлік тарапынан қолдау көрсетеміз», – деді Айдарбек Сапаров.
