Қазақстан Республикасы Ұлттық қауіпсіздік комитеті Шекара қызметінің Жетісу облысы бойынша департаментіне қарасты Алакөл ауданы басқармасында мерзімді әскери борышын өтеп жатқан қатардағы жауынгер Жорабек Ақжол Асқарұлы өзінің үлгілі тәртібімен және жоғары физикалық дайындығымен көзге түсіп келеді.
Жорабек Ақжол Асқарұлы 2004 жылы 16 қыркүйекте Жетісу облысы, Кербұлақ ауданының Шоқан ауылында дүниеге келген. 2025 жылдың 8 наурызында Қазақстан Республикасының Қарулы Күштері қатарына шақырылып, қазіргі уақытта Алакөл шекара аймағында Отан алдындағы қасиетті борышын абыроймен атқаруда.
Әскери борышын өтемес бұрын арнайы орта білім алып, теміржол саласы бойынша жолсерік мамандығын меңгерген. Еңбексүйгіштік пен тәртіпке бейімділігі әскер қатарына дейін-ақ байқалған. Сонымен қатар еркін күреспен шұғылданып, аудандық және облыстық спорттық жарыстарда жүлделі орындар иеленген. Бұл спорттық шеберлігін әскери өмірде де шыңдай түсуде.
Қатардағы жауынгер Жорабек Ақжол шекарашы әскери қызметшілер арасындағы түрлі спорттық сайыстарда жоғары нәтижелер көрсетіп келеді:
-
Денені жерден көтеру жаттығуынан — 111 рет орындап, 1-орынға ие болды;
-
10х10 эстафеталық жүгіруде — 24 секунд нәтижемен 2-орын алды;
-
400 метрге жүгіруде — 1 минут 07 секунд көрсеткішімен 3-орын;
-
Гир көтеру жаттығуында — 47 мәрте көтеріп, 3-орынға ие болды.
Көпбалалы отбасынан шыққан Ақжол — үйдің ортаншы перзенті. Екі әпкесі, бір ағасы және бір інісі бар. Отбасына, туған жерге деген сүйіспеншілігі мен ата-анасының сенімін ақтау жолындағы жауапкершілігі оның күнделікті әскери қызметінен анық байқалады.
Қатардағы жауынгер Жорабек Ақжол Асқарұлы әскери тәртіпке берік, отансүйгіштік қасиеті жоғары, шекара шебіндегі сенімді тірекке айналған сарбаз. Оның еңбекқорлығы мен жауынгерлік рухы қарулас серіктеріне үлгі болуда.
