Бұл туралы 7-su.kz ақпараттық порталы Aikyn.kz сайтына сілтеме жасап хабарлайды.
Өнеркәсіп және құрылыс министрлігінің негізгі жобаларының бірі – қолданыстағы ақпараттық жүйелерді алмастыратын «Тапсырыс берушінің бірыңғай терезесі» платформасы. Бұл жүйе egov.kz электрондық үкімет порталымен біріктіріліп, құрылыс процесін толық цифрлық сүйемелдеуді қамтамасыз етеді.
Тұрғын үй саласында бірнеше ипотекалық бағдарлама іске қосылды. Соның бірі – «Наурыз» ипотекалық бағдарламасы. Әлеуметтік осал топтар үшін жылдық 7%, ал қалған азаматтар үшін 9% мөлшерлемемен несие беру қарастырылған. 2025 жылдың басынан бастап бұл бағдарлама аясында 202 млрд теңгеден астам қаржыға 7 746 несие берілген.
Бұған қоса, 2019 жылдан бері іске асырылып келе жатқан «Бақытты отбасы» бағдарламасы бойынша 7 мыңнан астам көпбалалы отбасы тұрғын үймен қамтылды. 2025 жылы тағы 1 мыңнан астам отбасына баспана беру жоспарланған.
Сонымен қатар, «Нұрлы жер» мемлекеттік бағдарламасы аясында 2020 жылдан бері 2 мыңнан астам көппәтерлі үйге күрделі жөндеу жүргізілді. Тек 2024 жылы – 233 үй жөнделсе, 2025 жылы тағы 421 нысанды жөндеу жоспарда бар.
Моноқалалар мен ауылдық аумақтарды дамытуға арналған «Отау», «Асыл мекен» және «Наурыз» бағдарламалары жеңілдетілген тұрғын үйді, оның ішінде екінші нарықты да қарастырады. Бұл әсіресе халқы аз өңірлер үшін өзекті болып отыр.
Қала құрылысында жайлы әрі тұрақты тұрғын үй ортасын қалыптастыру үшін «Қалаларды кешенді стандарттау» ережесі қабылданды. Бұл құжат урбанистика саласын жаңа сапалық деңгейге шығаруға бағытталған.
Жоғарыда аталған барлық шаралар құрылыс саласында тұрақты экожүйе қалыптастырып, жұмыспен қамту деңгейін арттыруға, урбанизация сапасын жақсартуға және тұрғын үйге қолжетімділікті кеңейтуге ықпал етпек.
