Витебскідегі Славян базары-2025 халықаралық ән байқауының жеңімпазы эстрада әншісі Алмагүл Батталиева Б. Құранбек атындағы Журналистер үйіне келіп, тілшілерге сұхбат берді. Ол баспасөзмәслихатында Гран-приге қол жеткізу оңай болмағанын сөз етті. Ыстық ықылас, құрмет-қошеметпен күтіп алған жерлестеріне ризашылығын білдірді.
Жас әнші Беларуссияда өткен дәстүрлі «Славян базары» халықаралық байқауына 8 рет бақ сынаған. Биыл 14 мемлекеттен келген өнерпаздармен додаға түсіп,. «Вечность» әнін орындап, қазылар алқасынан 137 бал жинады. Осылайша, халықаралық конкурстың бас жүлдесін жеңіп алды.
– Жетісу облысы мені ерекше жылылықпен қарсыалып жатыр. Өте қуаныштымын. Шыны керек мұндайды күтпедім. Гран-при жүлдесі қолымда, бірақ әлі де сене алар емеспін жеіске жеткеніме. Ол жақта бәрі мықты, өз саласының шеберелері. Облыс әкімі Бейбіт Өксікбайұлына үлкен алғыс білдірем осындай додаға сенім артып жібергеніне. Сенемдеріңізді ақтадым деп ойлаймын, – дейді «Славян базары-2025» халықаралық байқауының жеңімпазы Алмагүл Батталиева.
Алмагүл Батталиева Алматы қаласының тумасы. Бірақ Жетісу облыстық филармониясында жұмыс істейді. Жеке дауыстағы әнші. Өңір халқын өз өнерімен тәнті етіп, мәдениет саласының дамуына үлес қосып келеді.
Медет ЖҰМАБАЙ
