Жетісу өңірінде Абай Құнанбаевтың 180 жылдығына орай «Ұлы халықтың – ұлы Абайы» атты 10 күндік өткізіледі. Мұнда хакімнің өміршең шығармалары мен өмір жолы дәріптеледі. Шара шеңберінде концерттік бағдарламалар ұйымдастырылып, Ұлттық ойын күні аталып өтіледі. Бұл жөнінде Журналистер үйіндегі баспасөз мәслихатында кеңінен айтылды.
«Қоғамдық Келісім» ҚММ басшысы Еркебұлан Ақболатов пен «Қазақ мәдениеті мен салт-дәстүрі орталығы» қоғамдық қорының төрағасы Серікбол Шыныбаев аталған шараны өткізуге дайын екендерін мәлімдеді. Бекітілген жоспар бойынша Абай Құнанбайұлының 180 жылдығын мерекелеу 1-10 тамыз аралығында жүзеге асырылады. Оған Жетісу облыстық Қазақстан халқы Ассамблеясының бастамасымен этномәдени бірлестіктер, аналар мен ақсақалдар кеңестері, тағы да басқа ұйымдар атсалысуға әзір.
– Жобаның мақсаты – қазақтың ұлы ақыны, философы және ағартушысының рухани мұрасын насихаттау, жастар арасында ұлттық құндылықтарды нығайту, қоғамдық келісімді дамыту және көпэтносты қоғамда рухани сабақтастықты сақтау. Сонымен қатар әлеуметтік желілерде құттықтаулар, тақырып бойынша бейнероликтер жариялау, Абайдың өлеңдерін оқып, әндерін орындау, ақынға қатысты сауалнамалар, көрмелер, қазіргі қоғамдағы ғылым мен руханият, зияткерлік және ұлттық ойындар туралы пікірсайыстар өткізу жоспарланған. Айтулы мерейтойға облыстағы 20-дан астам этномәдени орталықтар, мәдениет, архивтер және құжаттама басқармасы, «Абай» мейрамханасы, «Jetisý jastary» коммуналдық мемлекеттік мекемесі, «АМАНАТ» партиясы атсалысып отыр, – дейді «Қоғамдық Келісім» ҚММ басшысы Еркебұлан Ақболатов.
Онкүндік «Абай – мәңгілік ғұмыр» атты поэзиялық кешіпен аяқталады. «Абай» мейрамханасының террасасында «Ашық микрофон» форматында өтеді. Онда жастар мен зиялы қауым өкілдері ақынға арнаған өлеңдерін оқып, музыкалық шығармаларын ұсынады.
Медет Жұмабай
