Мемлекеттік қызмет саласы – елдіктің тірегі. Бұл жүйенің тұрақтылығы мен сапасы Отанның даму қарқынына, халықтың әл-ауқатына, қоғамдық сенімге тікелей әсер етеді. Сондықтан да соңғы жылдары бұл салада кешенді реформалар жүргізіліп келеді. Президент Қасым-Жомарт ТОҚАЕВТЫҢ бастамасымен «Халық үніне құлақ асатын мемлекет» тұжырымдамасы негізінде мемлекеттік басқарудың жаңа моделі қалыптасып жатыр. Бұл модель – ашықтықты, тиімділікті, нәтижеге бағытталуды және ең бастысы – халыққа жақын болуды талап етеді.
Елімізде әрбір мемлекеттік қызметші мемлекеттік бағдарламалар мен ауқымды реформаларды іске асыруға елеулі үлес қосуда. Мемлекеттік қызмет жүйесінде де түбегейлі жаңғырту жүріп жатыр. Мемлекеттік қызмет істері агенттігі бұл реформалардың негізгі үйлестірушісі ретінде меритократияны, кәсібилікті, ашықтық пен адалдықты басты қағидат ретінде ұстанып келеді. Соңғы жылдары қызметке іріктеу тәртібі жеңілдетіліп, әділетті бағалау мен адам әлеуетін ескеретін заманауи тәсілдер енгізілді. Қызметке орналасу конкурстары толығымен автоматтандырылды, үміткерлердің қабілетіне қарай ашық бәсекелестік ортасы қалыптасты.
Мұнда алғаш кірген жастар үшін тәлімгерлік институты жолға қойылды. Бұл – жас мамандардың кәсіби бейімделуіне, жауапкершілікті сезінуіне, ұжыммен оңай араласуына үлкен септігін тигізеді.
Әдеп жөніндегі кеңестер профилактикалық сипатта жұмыс істей отырып, әдептілік мәдениетін арттыруда маңызды рөл атқаруда. Яғни, қызмет барысында қызметшілердің мінез-құлқына, этика нормаларына ерекше назар аударылады.
Сондай-ақ қазіргі заманда мемлекеттік қызметтің дамуы цифрлық технологиялармен тығыз байланысты. Осыған орай Агенттік «E-қызмет» жүйесі, кадрлық онлайн платформалар, мансапты жоспарлау құралдары арқылы барлық кадрлық процестерді біріздендіріп, автоматтандыруға басымдық беріп отыр. Бұл – адам факторын азайтуға, процестердің ашықтығы мен әділеттілігін арттыруға бағытталған нақты қадамдар.
Мемлекеттік қызметшінің кәсіби деңгейін арттыру мақсатында оқыту жүйесі де жаңартылды. Қызметшілердің құзыреттеріне негізделген оқу бағдарламалары әзірленіп, нақты қажеттілікке қарай қайта даярлау курстары енгізілді. Бұл заман талабына сай, бәсекеге қабілетті маман даярлауға мүмкіндік береді.
ҚР Мемлекеттік істері агенттігінің Жетісу облысы бойынша департаменті тарапынан да осы бағыттағы жұмыстар жүйелі түрде жүзеге асырылып келеді. Атап айтқанда, ашық конкурстық іріктеулер, сыбайлас жемқорлықтың алдын алу, әдеп нормаларын түсіндіру, кәсіби оқыту, мемлекеттік қызметтің оң имиджін қалыптастыру бойынша бірқатар жобалар іске асырылды. Біз өз тарапымыздан мемлекеттік қызметтің сапасын арттыруға, әділетті кадрлық саясат жүргізуге, азаматтардың құқықтары мен заңды мүдделерін қорғауға әрдайым басымдық беріп келеміз.
Құрметті мемлекеттік қызметшілер! Сіздер елімізді жаңғырту жолындағы барлық бастамалардың нақты орындаушысы саналасыздар. Мемлекетіміздің дамуы жолында біліктіліктеріңіз бен адал еңбектеріңіз арқылы үлес қосып келесіздер. Әрқайсыларыңызға толағай табыс, зор денсаулық, абырой және ел сенімін ақтайтын табанды еңбек тілеймін!
Қобылан Манап,
ҚР Мемлекеттік қызмет істері агенттігінің Жетісуоблысы бойынша
департаментінің басшысы
