Астанада су тасқынынан зардап шеккен тұрғындарға көмек ретінде Kaspi Bank бөлген 620 млн теңгені жымқыру фактісі бойынша сот процесі жалғасып жатыр, деп хабарлайды 7-su.kz ақпараттық порталы.
Қылмыстық іс бойынша айыпталушылар ретінде екі адам – Перизат Қайрат пен оның анасы Ғайни Алашбаева танылған.
Сот отырысында өткен жарыссөздер барысында Kaspi Bank өкілі Айдар Ксенбаев айыпталушылардың кінәсі іс материалдарымен, куәгерлердің айғақтарымен және сараптама нәтижелерімен толық дәлелденгенін атап өтті. Оның айтуынша, көмекке бөлінген қаражат айыпталушылар тіркеген ұйымның есепшотына өтеусіз негізде аударылған.
Kaspi Bank тараптардың бірі ретінде айыптау позициясын қолдап, келтірілген залалдың толық көлемде өтелуін талап етті. Сонымен қатар, тәркіленген мүлікті шығынды ішінара өтеу құралы ретінде беру туралы азаматтық талап қойды.
Сот ісі әлі де жалғасуда. Қосымша ақпараттар кейінірек жарияланады.
