Талдықорған қаласының әкімі Ернат БӘЗІЛ ардагерлер мен қоғамдық кеңес мүшелерімен бірге бірқатар нысанды аралап, қалпына келтіру және абаттандыру жұмыстарының барысын бақылады.
Алғашқы аялдама – «Үш ата» ескерткіші. Естеріңізге сала кетейік, бұл ескерткіш 2006 жылы қазақ халқының біртуар тұлғасы – Ескелді би, Балпық би және Қабылиса жырауға арналып орнатылған. Осы айдың басында облыс әкімі Бейбіт ИСАБАЕВ нысанды аралау кезінде мердігер компания «Қыран құрылысшы» ЖШС-на жөндеу жұмыстары барысында кеткен бірқатар кемшілік пен аяқталмаған тұстарды түзету қажеттігін ескерткен еді. Осы жолы қала басшысы мен қоғамдық кеңес мүшелері де сол мәселелерге ерекше назар аударды.
«Қыран құрылысшы» ЖШС басшысының орынбасары Аслан Бекеновтің айтуынша, ескерткіш маңы толық жаңартылған. Баспалдақ кафельдері мердігердің өз есебінен қайта төселген. Ескерткішке бояу жүргізіліп, бастапқы келбеті қалпына келтірілген.
Жұмысқа екі бригада қатыстырылған. Бірі – гранитпен, екіншісі – тас төсеу ісімен айналысады. Қазіргі таңда жөндеу жұмыстары толығымен аяқталған. Тек ескерткіш маңын абаттандыру мен қоқыс шығару жұмыстары жүргізілуде.
Келесі нысан – Қабанбай батыр ескерткіші. Мұнда да толық реставрация жасалған. Ардагерлер атқарылған жұмысқа оң бағасын беріп:
– Республика күні қарсаңында қаламыздың ажары кіріп келе жатқанына қуаныштымыз. Маңызды тарихи орындар жөнделіп, жаңарып жатыр. Ескерткіштерге жасалған бұл жұмыс үлкен құрметтің белгісі. Еңбегі сіңген барша азаматқа алғыс айтамыз, – деді ардагер Тұрсынбай Галинов.
Оның ойын ардагер журналист, Халықаралық «Алаш» әдеби сыйлығының иегері Әміре Әрін де қолдап:
– Президентіміз әрдайым «Тәуелсіздік – бәрінен қымбат!» деп атап өтеді. Ұлы бабаларымыз осы ұлы құндылық жолында жанын қиған. Сол ерлікті ұмытпай, ұрпаққа насихаттау – біздің парызымыз. Өткенге тағзым – елдің рухани байлығының бастауы, – деді.
Соңғы нысан – қаланың 8 шағын-ауданындағы жаңа саябақ. Қалалық тұрғын үй-коммуналдық шаруашылығы бөлімінің мәліметінше, мұнда тұрғындарға арналған қолайлы демалыс аймағы салынып жатыр. Өткен жылы жобасын «Шымгорпроект» ЖШС әзірлеген. Құрылыс жұмыстарын «Нурали комфорт» ЖШС жүзеге асыруда. Жобаның жалпы құны шамамен 270 миллион теңгені құрайды. Ол шағынауданның орталық бульварының екі жағында орналасқан. Қазіргі уақытта аумақ абаттандырылып, шағын сәулеттік формалар орнатылған, автосуару жүйесі тартылған. Енді көгалдандыру жұмыстары атқарылмақ.
«Бірлік» шағынауданының тұрғыны Назгүл Әбілғайсанова жаңа саябақтың бой көтеруіне ризашылығын білдіріп:
– Бұл жаққа көшіп келгеніме 4 жыл болды. Енді дәл үйімнің қасында әдемі саябақ пайда болады. Таза ауада серуендейтін, демалатын орын бар. Қасында мектеп те жақын. Осындай игі істі қолға алған азаматтарға үлкен алғыс білдіремін, – деді.
Санжар СҰЛТАНҒАЗЫ
