Кез келген бизнесте тұтынушылардан тұрақты сұраныс болса, ол істің жанданатыны сөзсіз.
Қазіргі уақытта халықтың сатып алу қабілетінің төмендеуіне қарамастан нан және басқа да ұн өнімдерін тұтыну көлемі әрдайым жоғары болып қала береді. Ауданда адал еңбек ететіндердің бәрінің табысты шағын бизнесі бар. Солардың бірі Сарыөзек ауылында нан пісірудің қыр-сырын меңгерген «Берекет» жеке кәсіпкерлігі наубайханасының иесі Нұрлан Құрманбеков.
Жеке кәсіпкер 10 жылға жуық уақыт жергілікті тұрғындардың игілігі үшін жұмыс істеп келеді. Күнделікті пісіріліп, ыстық пештен шығатын хош иісті нан-тоқаштар халыққа қолайлы бағада қолжетімді. «Берекет» наубайханасының иесі қиындықтар кезінде де үмітсіздікке бой алдырмай, жақсылықтан қол үзбегенін айтты.
– Бизнестің жыл сайын ауқымы кеңейіп келеді. Өнімдердің тұрақты тұтынушылары да көбеюде. Сол себепті қазір жұмыс қарқыны жоғары. Күн сайын шамамен 250 бөлке нан пісіріледі. Бізде демалыс жоқ, сенбі, жексенбі күндері де жұмыс істейміз. Өйткені, бәсекелестік көп. Бір күн демалу нарықтағы жағдайға кері әсерін тигізуі мүмкін, – дейді Нұрлан Құрманбеков.
Сондай-ақ, ол әр істің өзіне тән қиындығы, түбінде қажырлы еңбектің қайтарымы болатынын сөз етті.
Айгүл БАЙБОСЫНОВА,
Кербұлақ ауданы
