Облыстың шалғай ауылдарындағы мектептерге 8 жаңа автобус берілді. Қоғамдық көліктердің кілтін облыстық білім басқармасының басшысы Дәурен Жүнісов салтанатты түрде табыстады.
Ескелді ауданының Бақтыбай және Алдабергенов ауылдарындағы, Қаратал ауданының Көкпекті, Кербұлақ ауданының Шанханай, Сарыбұлақ, Сарыөзек ауылындағы, Көксу ауданының Балпық би ауылындағы, Сарқан ауданының Черкасск ауылындағы мектеп оқушылары енді білім алуға су жаңа көлікпен барады.
Облыстық білім басқармасының басшысы Дәурен Жүнісов мектептерді жаңа автобустармен қамту балалардың қауіпсіздігін қамтамасыз етуге бағытталған маңызды қадам екенін атап өтті.
– Біздің мектепте 122 оқушы бар. Оның 15-і Аққайың ауылынан келіп оқиды. Бұған дейін оқушыларды тасымалдайтын ескі автобус болған. Енді оның орнына жаңа, заманауи, қолайлы автобус берілді. Бұл жайлылық қана емес, балалардың қауіпсіздігі үшін де маңызды, – дейді Черкасск орта мектебінің директоры Бауыржан Ибраимов.
Бұл автобустар отандық өндіруші «Daewoo Bus Kazakhstan» ЖШС зауытында жасалған. Автобустарда қауіпсіздік белдіктері, ауа салқындату жүйесі, дыбыс зорайтқыш, сигнал түймесі бар. Сол сияқты дәрі қобдишасымен, өрт сөндіргіш және авариялық белгілермен жабдықталған.
Жалпы Жетісу облысының мектептерінде 94 автобус оқушылар тасымалына қызмет көрсетеді. Бұл автобустармен 87 елді мекеннің 2513 оқушысы тасымалданады.
«Жетісу-Ақпарат»
