Қазақстан Республикасының Мемлекеттік рәміздер күніне орай, ҚР ҰҚК Шекара қызметі Жетісу облысы бойынша департаментіне қарасты Алакөл ауданы бойынша шекара басқармасының Сарқан шекара бөлімінің жеке құрамы Сарқан ауданы әкімдігі және жергілікті мекеме қызметкерлерімен бірлесіп ұйымдастырылған салтанатты шеруге қатысты.
Мемлекеттік рәміздер – Ту, Елтаңба және Әнұран – халқымыздың тәуелсіздігі мен егемендігін айқындайтын киелі құндылықтар. Аталған шеруде қатысушылар сап түзеп, көк байрақты жоғары көтеріп, елдік рух пен патриоттық сезімді айшықтай білді.
Іс-шара барысында Сарқан ауданы әкімдігінің өкілдері мен қоғам белсенділері Мемлекеттік рәміздердің тарихы мен тәрбиелік маңызын тілге тиек етіп, жастарға елжандылық рухын дарытудың маңыздылығын атап өтті. Шекара бөлімінің әскери қызметшілері шеруде тәртіп пен жинақылықтың, Отан алдындағы жауапкершіліктің айқын үлгісін көрсетті.
Бұл тағылымды шара шекарашылар мен жергілікті қауым арасында өзара ынтымақтастық пен рухани байланысты нығайтты. Мемлекеттік рәміздер күні — елге қызмет етудің қадірін ұғындыратын, Отанға деген адалдықты арттыратын маңызды мереке ретінде тағы да өз маңызын дәлелдеді.
ҚР ҰҚК Шекара қызметі Жетісу облысы бойынша депаратаменті
