Қазақстан Республикасының Мемлекеттік рәміздер күні – әрбір азаматтың жүрегінде отансүйгіштік сезімді оятатын, ұлттық бірегейлікті ұлықтайтын аса маңызды мереке. Осыған орай, ҚР ҰҚК Шекара қызметі Жетісу облысы бойынша департаментіне қарасты Радиотехникалық бақылау пунктінде тәрбиелік мәні зор шара өтті.
Аталған іс-шараны Әскери полиция бөлімінің қызметкері капитан Ж.Болатов жеке құраммен бірлесе отырып ұйымдастырды. Ол рәміздердің тарихы мен мән-мағынасы жайлы терең мағлұмат беріп, мемлекеттік Ту, Елтаңба және Әнұранның ел тәуелсіздігін бекемдейтін, ұлт рухын асқақтататын құндылықтар екенін ерекше атап өтті.
Жиын барысында сарбаздар мен офицерлер Мемлекеттік Әнұранды бірге орындап, рәміздерге құрмет білдірді. Сондай-ақ, шара барысында жас әскери қызметшілерге патриоттық бағыттағы бейнероликтер көрсетіліп, сұрақ-жауап түрінде зияткерлік бөлім ұйымдастырылды.
Капитан Ж.Болатов өз сөзінде жас сарбаздарды Отан алдындағы адалдық пен қызметке берілгендікке тәрбиелеудің маңыздылығын айтып, ел намысын қорғау – әрбір шекарашының қасиетті борышы екенін жеткізді.
Мемлекеттік рәміздер күніне арналған бұл мазмұнды жиын бөлімшенің моральдық-психологиялық ахуалын нығайтып, жеке құрамның отаншылдық рухын арттыруға сүбелі үлес қосты.
ҚР ҰҚК Шекара қызметі Жетісу облысы бойынша депаратаменті
