Жастардың әлеуетін арттыруға бағытталған жаңа серіктестіктің іргесі қаланды. Осы орайда Алматы облысы жастар саясаты мәселелері жөніндегі басқармасы мен Жетісу жастары ұйымының Конгресі, «Фирма БЕНТ» ЖШС өзара ынтымақтастық туралы меморандумға қол қойды. Олар бірлесіп мұқтаж отбасылар мен ардагерлерге азық-түлік таратып, көмек қолын созды.
Меморандумға қол қоюдағы негізгі мақсат – Қазақстанда волонтерлік қозғалысты дамыту, волонтерлік бастамаларды қолдау және жүйелеу, сондай-ақ еріктілердің қызметін үйлестіретін заманауи фронт-офис құру арқылы азаматтардың қоғамдық өмірге белсенді қатысуына жағдай жасау. Сондай-ақ, меморандум аясында алдағы уақытта бірлескен форумдар, оқыту тренингтері, қайырымдылық акциялары мен кең ауқымды жобалар өткізу жоспарланған. Бұл шаралар – жастардың азаматтық белсенділігін арттыруға, олардың қоғамдық салада өз орнын табуға жол ашады, — дейді бастамашылар.
– Бүгін БЕНТ компания тобы тарихымыз үшін аса маңызды құжатқа қол қойды – бұл волонтерлер клубын құру туралы меморандум. БЕНТ компаниясы осы уақытқа дейін жүйелі түрде қайырымдылық көмектер көрсетіп келеді. Еріктілер клубының құрылуы – көмекке мұқтаж жандарға қолдау көрсетудің тағы бір қадамы болмақ. Адамдарға көмектесу, қолдау көрсету – біз үшін асыл да игі іс деп санаймыз, – дейді «Фирма БЕНТ» ЖШС өкілі Алена Чернова.
Ынтымақтастықтың нәтижесі ретінде еріктілер тобы Қонаев қаласындағы әлеуметтік тұрғыда осал топтағы 10 тұрғынға азық-түлік себеттерін табыстады. Бұл – меморандум шеңберінде қолға алынған алғашқы қайырымдылық акцияларының бірі. Жастар ұйымы алдағы уақытта бұл бағыттағы жұмыстарды жүйелеп, игі дәстүрге айналдыруды көздеп отыр. Еріктілер қатары да күн санап артып келеді. Кәсіпорын бұл бастаманы толық қолдап, алдағы уақытта әлеуметтік жобалар мен волонтерлік шараларға тұрақты түрде қатысатынын жеткізді.
Медет ЖҰМАБАЙ
