Кейінгі кезде Талдықорған қаласындағы жолдардың сапасына сын айтылып, жөндеу жұмыстарының баяу жүріп жатқандығы талқыға түскен болатын. Тұрғындар тарапынан айтылған сын-ескертпе електен өтіп, жергілікті биліктің назарына ілікті. Осыған орай қала әкімі Ернат Бәзіл облыс орталығын аралап, атқарылған жұмыстарды көрді.
Сапаның маңыздылығын айтып, құрылысты белгіленген уақытында аяқтау қажеттігін ескерткен Ернат Дүйсенбек-ұлы қалаға қарасты 3-ші бөлімше, Өтенай ауылдық округі, «Шығыс» және «Көктал» тұрғын үй алабындағы жолдардың құрылысымен танысты. Одан кейін Юрий Гагарин, Темірғали Рүстембеков және Ілияс Жансүгіров көшелеріндегі орташа жөндеу жұмыстары жүріп жатқан учаскелерді көрді. Әр учаскедегі кемшілікті көрген қала басшысы мердігер мекемелерге қатаң ескерту жасады. Оның айтуынша, сапаға деген салғырттық пен белгіленген мерзімнен кешігу тұрғындардың наразылығын тудырады. Құрылыс жұмыстарының сылбыр жүруі мердігер компаниялар үшін ұят.
Бұқаралық ақпарат құралдарына түсініктеме берген Ернат Дүйсенбекұлы: – Қала тұрғындарының жайлылығы мен қауіпсіздігі – жол сапасына тікелей байланысты. Сондықтан әр жұмысқа үлкен жауапкершілікпен қарау керек. Ал, қала аумағындағы жол сапасын жақсарту бағытындағы жұмыстар жалғаса береді, – деді.
Серік ҚАНТАЙ
