Жауаптылардың сөзінше, осымен 12-рет ұйымдастырылып отырған байқауға жалпы 22 отбасы қатысуға ниет білдіріп, оның 12-сі ақтық кезеңге жолдама алған. Нәтижесінде 5 отбасы жүлделі орынға, тағы 5 отбасы ынталандыру сыйлығына ие болған. Ал биылғы байқаудың басты ерекшелігі – «Жұмысшы мамандықтар жылы» аясында қарапайым отбасы мүшелері мен ұлттық құндылықтарды кеңінен дәріптеп жүрген жанұяларға баса көңіл бөлінген.
– Мұндай шаралардың басты мақсаты – отбасылық құндылықтарын сақтауға баса мән беру. Оның ішінде ата-анаға құрмет, бала тәрбиесі мен бір шаңырақ астында берекелі өмір сүрудің маңыздылығын арттыру. Бүгінгі жастар үшін өнегелі адамдардың өмір жолы үлкен мектеп. Салт-дәстүр сабақтастығын сақтап, жақсыдан үлгі алған жас шаңырақ иелерінің қашанда берекелі болады», – деді шаһар басшысы Ернат Дүйсебекұлы.
Осыдан соң отбасы құндылықтарын сақтап, салт-дәстүрді кеңінен дәріптеген, жанұяның жағымды үлгісі мен мәртебесін көрсете білген үздіктер марапатталды. Байқау қорытындысы бойынша топ жарған Болатхановтар отбасы I орынды ие болса, II орынды Сқақов және Шаяхмет отбасылары еншіледі. Сонымен бірге III орын жүлдесі Есенғабылов және Өмірғалиевтер отбасына бұйырды. Жеңімпаздарға қала әкімінің дипломы, бағалы сыйлықтар және арнайы мүсіншелер табысталды. Ал бұл жолғы «Мерейлі отбасы–2025» қалалық байқауында жолдамаға ие болған Болатханов және Сқақовтар отбасы енді Талдықорған қаласының атынан облыстық кезеңде бақ сынамақ.
Айдын КӘЛІМХАН
