Оқу-ағарту министрі Жұлдыз Сүлейменова Мәжіліс кулуарында журналистердің сұрағына жауап бере отырып, министрлікте ауқымды жаңа реформалар болмайтынын, керісінше, бұған дейін басталған реформалардың жалғастырылатынын мәлімдеді, – деп хабарлайды 7-su.kz ақпараттық порталы BAQ.KZ cайтына сілтеме жасап.
Қазір біз білім беру саласында бұрын қабылданған барлық реформанды қайта талдап, сараптап жатырмыз. Басты мақсат – білім сапасын арттыру. Бұл – жаңа реформа емес, бұрын басталған өзгерістердің жалғасы, – деді министр.
Оның айтуынша, министрліктің екінші маңызды бағыты – мұғалімдерді қолдау және олардың мәртебесін күшейту.
Бұл бағытта бірнеше мәселе бар. Атап айтқанда, мұғалімдердің аттестациясы, кәсіби деңгейін арттыру, сондай-ақ педагогтерге тән емес функцияларды алып тастау үшін заңнамалық қолдау қажет. Осы мәселелер пысықталуда, – деді Сүлейменова.
Министр сонымен қатар мұғалімдердің жалақысын және шәкіртақыны көтеру мәселесі үш жылдық бюджетке енгізілгенін айтты.
Жалақы мен шәкіртақыны көтеру бойынша сұрақтар көтерілді. Бұл шаралар 2024-2026 жылдарға арналған республикалық бюджетте қарастырылған, – деді ол.
Бұған дейін хабарлағанымыздай, Оқу-ағарту министрі Жұлдыз Сүлейменова «Білімге бөлінетін қаржы қысқарса, мұғалімдердің жалақысы сақтала ма?» деген сұраққа жауап берді.
