Бүгін «Әділет» партиясының сайлауалды штабының өкілдері «BARS TECHNOLOGIES» серіктестігінің еңбек ұжымымен кездесті. Басқосуда өндіріс саласының тұрақты жұмыс істеуі мен кәсіпорындардың даму мүмкіндіктеріне қатысты өзекті мәселелер ортаға салынды.
Кездесу барысында отандық өндірісті қолдау, кәсіпорындардың технологиялық әлеуетін арттыру және жаңа өндірістік жобаларды жүзеге асыру мәселелері талқыланды. Өндіріс орындарының тұрақты жұмыс істеуі өңір экономикасының орнықтылығына, жаңа жұмыс орындарының ашылуына және жергілікті халықтың табысына тікелей әсер ететіні атап өтілді.
Сонымен қатар кәсіпорындардың өндірістік қуатын кеңейту, заманауи технологияларды енгізу және еңбек өнімділігін арттырудың маңызы сөз болды. Өндірісті жаңғырту тек экономикалық көрсеткіштерді жақсартумен шектелмей, жұмысшылардың кәсіби біліктілігін арттыруға да мүмкіндік беретіні айтылды.
Жиында еңбек адамының жағдайына ерекше назар аударылды. Қауіпсіз еңбек ортасын қалыптастыру, қызметкерлердің әлеуметтік жағдайын жақсарту, тұрақты жұмыспен қамтуды қамтамасыз ету және жұмысшылардың кәсіби дамуына мүмкіндік жасау мәселелері бойынша пікір алмасты.
Кездесу соңында өндірісті дамытуға қатысты ұсыныстар тыңдалып, еңбек ұжымының пікірлері мен көтерген мәселелері назарға алынды
