Ауыл жұрты қойған әр сауалды мұқият тыңдап, нақты жауап берген шаһар басшысы бұл жолғы айтылған барлық өтініштердің шешу жолдары жан-жақты қарастырылатынын жеткізді. Осыдан соң ол өңірдегі ауыл-аймақты дамыту бағытында атқарылып жатқан жұмыстарға кеңінен тоқталып, биыл атқарылатын жоба-жоспарларымен де бөлісті.
Ернат Дүйсенбекұлының сөзінше, өткен жылғы кездесуде бұл бөлімше тұрғындары тарапынан түнгі жарық жетіспеушілігі, жол сапасы мен көше атауларының жоқтығы туралы біраз мәселелер көтерілген. Түскен өтініштерге сай көп өтпей мұндағы көшелерге Жетісу өңірінен шыққан Кеңес Одағының батырларының есімі беріліп, жол салу жұмыстары қолға алынып, электр бағаналары орнатыла бастаған. Нақтырақ айтқанда, өткен жылы бөлімше аумағындағы жалпы ұзындығы 2,6 шақырым 4 көшеге асфальт төселсе, биыл 6 шақырымдық 7 көшеге жөндеу жұмыстары жүргізілуде. Сондай-ақ, келер жылы тағы 9 көшеге жол салу жоспарланған.
– Мемлекет басшысының тапсырмасына сай өңірлерді өркендету өзекті. Осыған байланысты биылғы жылы 3-ші бөлімшеде инфрақұрылымдық жұмыстар аясында жалпы ұзындығы 15 шақырым болатын 20 көшеге жол жөндеу жұмыстары жүргізілмек. Бұл міндетті «РСУ 1» ЖШС мердігер мекемесі атқаруда. Ал, кезең-кезеңге бөлініп жүзеге асырылып жатқан мұндай жобалар осы бөлімше тұрғындарын көп жылдан бергі жол машақатынан біртіндеп арылтатын болады,– деді шаһар басшысы.
Еске сала кетсек, Талдықорған қаласы әкімдігіне қарасты 3-ші бөлімшеде бүгінде 150-ден астам отбасы ірге тепкен. Қазіргі кезде елдімекеннің жол инфрақұрылымын жақсарту, түнгі жарық, ауыз су, газ және кәріз жүйелерін ретке келтіру, қоғамдық көлікпен қамту жұмыстары жалғасуда.
Айдын КӘЛІМХАН
