Еліміздің басым саясатының бірі – дені сау, терең білімді ұрпақ тәрбиелеу. Алымды да қарымды тұлға, озық ойлы болашақтың азаматын қалыптастыру. Тәлім мен тәрбиенің, білім мен ілімнің тал бесігі саналатын мектеп екенін ескерсек, оқушыларды білім құдығын қазуға бейімдейтін алтын ұялардың заманауи болуы да күн тәртібінен түспейді.
Ел Үкіметі «Жайлы мектеп» ұлттық жобасын қолға алған. Мақсат – уақыт үдерісімен үндескен, замана көшіне ілескен мектеп салу, сол арқылы ұрпақ тәрбиелеу. Жоба басталғалы Жетісу өңірінің шекаралық аймақтарында 2 білім ордасының іргесі қаланып, Панфилов ауданында 1200 орынды мектеп пайдалануға берілді. Ал Алакөл ауданына қарасты Достық елді мекенфіндегі жайлы мектеп те оқушыларға есігін айқара ашатын күн жақын. Оны жуырда көзбен көріп, көңілге түйіп қайттық.
Достықтағы мектеп биыл 30 тамызда тұрғындар игілігіне пайдалануға берілмек. Мердігер «VentKarkaraServis» серіктестігі өкілдерінің айтуынша, құрылыс жұмыстарында кідіріс жоқ. 135 құрылысшы қарқынды еңбек етуде. Нәтижесінде, мектеп құрылысының даярлығы 70 пайызды құрап отыр. Оның ішінде қасбет жұмыстары, темір-бетон, металл конструкция және қабырғаны тұрғызу жұмыстары 100 пайыз аяқталған. Ең төменгі көрсеткіш көркейту-көгалдандыру жұмысында байқалады. Оның өзінде бұл бағыттағы жұмыстар 40 пайыз орындалған. Құны 5 млрд. теңгеге жуық қаражатқа бағаланған мектепті құлшына салып жатқандардың қатарында Асылжан Түймебай да бар. Айтуынша, мұндай оқу ордасында білім алатындарға қызыға да, қызғана да қарайды екен.
– Бұл Жетісу өңіріндегі заман көшіне ілескен 2-ші мектеп болмақ. Оқу ордасында оқушыларға бар жағдай жасалуда. Біз оқушы болған сәтте спортзалға айына бірер мәрте бас сұғатынбыз. Ал мына жайлы мектепте 2 спортзал бар. Заманауи жабдықтармен қамтылады. Кейде осындай жағдай жасалып жатқан оқушыларға қызыға да, қызғана да қараймын. Бізде оқушы кезімізде мұндай жағдай жасалмады. Қазақстанның тұтқасы болар ұрпақ тәрбиелейтін мектеп құрылысына атсалысып жатқанымды мақтанамын, – дейді құрылысшы.
Жалпы мектеп 3,8 гектар аумаққа орналасқан. 3 қабатты нысанның жалпы аумағы 4,5 мың шаршы метр. 600 орынды мектепті қоршаған 6 мың шаршы метр жер көркейтіледі, жасыл желекке бөленеді. Одан бөлек, оқу ордасында оқушыларға бар жағдай жасалмақ. Әр пәнге арналған кабинеттер заманауи жабдықтармен қамтамасыз етіледі. Оқушыларға еңбек ету, ұлттық құндылықтарды бойға сіңіру үшін бірнеше шеберханалар да болады.
Мектептің құрылысы Қазақстан бойынша бірінші рет «Битрикс» камералық бақылау жүйесі бойынша салынуда. Бұл бағдарламаның артықшылығы құрылыс жұмыстарын жергілікті атқарушы билік те, тапсырыс беруші де онлайн форматта қадағалайды.
«Samruk-Kazyna Construction» АҚ өңірлік жетекшісі Аян Сабитовтың айтуынша, заманауи мектептің құрылыс жұмыстары да жаңашыл әдіспен жүзеге асуда. Адам мен адам байланысы азайып, құжаттар онлайн форматта зерделенуде. «Е-құрылыс» бағдарламасы арқылы осындай жұмыстар жүзеге асып, сыбайлас жемқорлыққа бой алдырмау да қарастырылған.
Дастанбек САДЫҚ
