Панфилов ауданында 2026-2027 оқу жылына дайындық аясында дәстүрлі «Мектепке жол» республикалық қайырымдылық акциясы ұйымдастырылды. Биылғы шара аудан бойынша 49 білім беру ұйымын қамтып, әлеуметтік жағдайы төмен, көпбалалы отбасыдан шыққан, жетім және ата-анасының қамқорлығынсыз қалған балаларға қолдау көрсетуге бағытталды, – деп хабарлайды 7-su.kz ақпараттық порталы.
Акция аясында көмекке мұқтаж 5140 оқушының тізімі анықталып, қазіргі таңда олардың 3560-ына қажетті көмек көрсетілді. Балаларға мектеп формасы, аяқ киім және оқу құралдары табысталды.
Акцияны ақпараттық қолдау мақсатында аудандық білім бөлімінің және 49 білім беру ұйымының әлеуметтік желілерінде жарияланымдар орналастырылды. Сонымен қатар білім беру ұйымдарының аумағына жарнамалық плакаттар мен баннерлер қойылып, Жаркент қаласының орталығындағы Жібек жолы көшесіне билборд пен LED экранға арнайы ақпараттар шығарылды.
Акцияның маңызды шараларының бірі – 19 тамызда Жаркент қаласының орталық алаңында өткен «Балаға мейірім сыйла!» атты жәрмеңке. Іс-шараға аудан әкімдігі, кәсіпкерлер, сауда орындары, білім бөлімі және «Жылы жүрек» қайырымдылық қоры қатысты. Жәрмеңкеде мектеп формасы мен оқу құралдары төмендетілген бағамен ұсынылып, ата-аналар балаларына қажетті заттарды тиімді бағамен сатып алды.
Қайырымдылық бастамасына «Атамекен» кәсіпкерлер палатасы, «Жылы жүрек» қоры, Bank CenterCredit, Freedom Bank, «Қорғас – Шығыс қақпасы» арнайы экономикалық аймағы, «Қорғас» шекара маңы халықаралық ынтымақтастық орталығы, білім беру ұйымдары мен аудан кәсіпкерлері қолдау көрсетті.
«Мектепке жол» акциясы – аудан тұрғындары мен кәсіпкерлерінің әлеуметтік жауапкершілігі мен өзара қолдауының көрінісі. Басты мақсат – жаңа оқу жылын қарсы алатын әр баланың қажетті оқу құралдары мен киім-кешегі болуын қамтамасыз етіп, әлеуметтік жағдайына байланысты білім алудан шет қалуына жол бермеу.
