23 мамыр күні— Қазақстан Республикасы Ұлттық ұланының 5514 әскери бөлімінде «Полиция – балалардың қорғаны» республикалық акциясы аясында бірқатар тәрбиелік және танымдық іс-шаралар ұйымдастырылды. Шараға «Жас бүркіт» сыныптарының оқушылары мен әскери қызметшілердің балалары қатысты. Іс-шара Жетісу облысы Полиция департаментімен бірлесе өткізілді.
Акцияның негізгі мақсаты — құқық қорғау органдары мен әскери құрылымдардың жас ұрпақпен байланысын нығайту, балалардың құқықтық сауаттылығын арттыру, патриоттық сезім мен мемлекеттік рәміздерге, әскери қызметке деген құрметті қалыптастыру болды.
Күннің алғашқы бөлігінде балалар үшін ашық есік күні ұйымдастырылып, олар әскери бөлімнің тыныс-тіршілігімен танысты. Әскери техника, қару-жарақ көрмесі мен қызметтік бөлмелерді аралаған оқушылар әсерлі сәттерге куә болды.
«Отбасылық құндылықтар үйлесімділігі» атты конкурс-ойын бағдарламасы ерекше көңіл-күй сыйлап, отбасы мен ұлттық құндылықтарды дәріптеді. Балалар мен ата-аналар бірігіп түрлі тапсырмалар орындап, сыйлықтар мен марапаттарға ие болды.
Кештің көрігін «Живая музыка» атты музыкалық флешмоб қыздырды. Патриоттық әндер мен көңілді әуендер шырқалып, балалар мен әскери қызметшілер ортақ көңіл-күймен бірікті.
Соңғы бөлімде «Балалардың құқықтары мен міндеттері» атты профилактикалық танымдық кездесу өтті. Полиция қызметкерлері балаларға олардың құқықтары, қауіпсіздік ережелері мен қоғамдық тәртіптің маңызы туралы түсінікті тілде әңгімеледі.
Іс-шара соңында әскери бөлім басшылығы барлық қатысушыларға алғысын білдіріп, мұндай тәрбиелік маңызы зор кездесулер жас ұрпақтың бойында елге деген сүйіспеншілік пен жауапкершілік қалыптастыруға сеп болатынын атап өтті.
5514 әскери бөлімінің баспасөз қызметі
