Мемлекет басшысы Қасым-Жомарт Тоқаев құқық қорғау органдарының кеңейтілген алқа мәжілісінде қоғамда заңға құрмет пен жауапкершілік мәдениетін қалыптастырудың маңыздылығына ерекше тоқталды. Президент өз сөзінде «Заң және тәртіп» қағидаты мен жалпыұлттық деңгейде жүргізіліп жатқан «Таза Қазақстан» бастамасының ортақ мақсатына назар аударды, деп хабарлайды 7-su.kz ақпараттық порталы.
«Заң және тәртіп» қағидаты жауапкершілікті сезіну мәдениетімен тығыз байланысты. Елімізде «Таза Қазақстан» жалпыұлттық науқаны жүріп жатқанын білесіздер. Бұл маңызды бастама халықтың кең қолдауына ие болды. «Таза Қазақстан» – озық ойлы қоғам құруға арналған идеологиялық тұғырнаманың ажырамас бөлігі. Бұл – тек қоршаған ортаның тазалығын емес, ой мен сана тазалығын сақтау деген сөз, – деді Президент.
Мемлекет басшысы қоғамдық әдеп пен заңға құрметтің күнделікті өмірден, айналадағы тазалықтан басталатынын айтты. Сонымен қатар халықтың құқықтық мәдениетін арттыруға жүйелі түрде қарау қажет екенін атап өтті.
Жалпы, халықтың құқықтық мәдениетін көтеруге жан-жақты қараған жөн. Бүгін мен «Заң және тәртіп» апталығын жариялауды ұйғардым. Осы апта қоғамда заң мен тәртіпті насихаттау аптасы болмақ. Алдағы жеті күн құқықтық мәдениетті нығайтуға, сондай-ақ құқық қорғау органдарының абырой-беделін арттыруға арналуы керек, – деді Қасым-Жомарт Тоқаев.
Президенттің айтуынша, бұл бастама бір реттік акциямен шектеліп қалмауы керек. Керісінше, ол қоғамның құқықтық сана-сезімін арттыруға бағытталған маңызды әрі жүйелі жұмыс болуы тиіс.
«Заң және тәртіп» апталығына азаматтардың құқықтық сана-сезімін көтеретін маңызды, жүйелі шара ретінде қараған жөн, – деді Мемлекет басшысы.
Осы бастама аясында елімізде түрлі деңгейде құқықтық мәдениетті нығайтуға бағытталған іс-шаралар өткізу жоспарланып отыр.
