Текелі қалалық ауруханасында тарихта болмаған ота жасалды. Бұрын моношаһардағы ешбір дәрігер кеуде қуыс жолдарына мұндай күрделі ота жасамаған екен. Қалалық аурухананың бас дәрігері Ертай Көбелдесов 16 жастағы жасөспірімнің дертінің асқынуына жол бермей, дер кезінде аурудың алдын алған.
Ертай Тілеутайұлы Алматы қаласының тумасы. Семей мемлекеттік медициналық академиясының түлегі. Негізгі мамандығы – торакалды хирург, эндоскопист, балалар хирургі. Еңбек жолын Талдықорғандағы «Облыстық туберкулезге қарсы диспансерінде» балалар фтизиатры, учаскелік дәрігер болып бастаған. Қазіргі уақытта Текелі қалалық ауруханасының бас дәрігері болып қызмет етуде.
Ол 16 жастағы бозбаланың өкпесіне жасалған отаның тәуекелмен істелгенін айтады. Отаның алдында жан-жақты зерттеу жүргізіп, науқастың жай-күйін бақылапты. Көп уақыт жоғалтса жасөспірімнің жағдайы нашарлайтынын білгендіктен лезде қарекет қылған екен.
– Текелі қаласындағы ауруханада 16 жастағы жасөспірімге кезекті, жоспарлы ота жасалды. Диагнозы – сол жақ өкпенің эхинококкэктомиясы. Яғни, сол жақ өкпенің эхинококк кистасын хирургиялық жолмен алып тастау. Кеше ауруханаға жатқызылып, бүгін ота жасалды. Мұндай операция бұрын-соңды Текелі қаласында жасалған жоқ. Ота өте ауыр өтсе де науқастың жағдайы қалыпты, – дейді Текелі қалалық ауруханасының бас дәрігері Ертай Көбелдесов.
Медет ЖҰМАБАЙ
