Салтанатты шарада Бейбіт Өксікбайұлы Жетісу өңірі өз алдына дербес облыс болып, іргесі бүтінделгелі серпінді дамуға қадам басқанын, бұл ретте журналистердің өркендеу тенденциясына өзінше үн қосқанын қадап айтты.
– Қоғамды жаңа талаптарға сай дамытуда, билік пен қоғам арасында конструктивті диалог орнатуда бұқаралық ақпарат құралдарының рөлі айрықша. Технология өркендеп, ақпарат тарату форматы жаңарды, әлеуметтік желі, блог мәдениеті дәстүрлі медиамен қатар өмір сүріп келеді. Бірақ қай кезде де әділетті орта, жаңа қоғам құру жолындағы адал қызмет журналистиканың басты миссиясы болып қала береді. Ашық қоғам, таза бәсекелестік жағдайында сындарлы көзқарас, бұл, әрине, заңды. Дегенмен қай кезде де шыншыл ақпарат, сындарлы ұстаным, мемлекет тұтастығы, ел мүддесі алдыңғы орында тұруы тиіс. Жетісу облысының серпінді дамуына журналистер қауымының да қосқан үлесі аз емес. Бұл ретте біздің Жетісу өлкесі – қазақ журналистикасының өркендеуіне үлес қосқан талантты қалам иелерінің мекені, – деді аймақ басшысы.
Мұнан соң жыл көлемінде еңбегімен дараланған журналистер марапатталды. «Жетісу» телерадиокомпаниясының жаңалықтар бөлімі қазақ редакциясының бас редакторы Гүлжанат Мақұлжановаға «Құрмет» орденін, «Жаркент өңірі» газетінің фототілшісі Жұмағазы Бейсебекке «Ерен еңбегі үшін» медалін, Қазақстан Журналистер одағы Жетісу облыстық филиалының жетекшісі Мейрам Жанаділовке «Еңбек ардагері» медалін табыстады. «Жетісу» телеарнасының бас редакторы Антон Хатеновский, «Вестник Жетісу» газетінің бөлім редакторы Бейбіт Мамлеев, «Текелі тынысы» газетінің бас редакторы Торғын Тұрлыбаева «Ақпарат саласының үздігі» төсбелгісін кеудесінде жарқыратты. Жиында сөз алған Гүлжанат Мақұлжанова салаға білдірген қолдауы үшін облыс басшылығына алғыс білдірді.
– Мемлекет басшысы айтқандай, әлемде болып жатқан күрделі геосаяси, геоэкономикалық жағдай шиеленіскен тұста әрбір журналистің ағартушылық миссиясы алға шығады. Ақпараттық майданда халыққа дұрыс саяси бағдар беру басты парызымыз. Сол міндетті қазіргі қаламды қару еткендер жүйелі жүзеге асыруда. Облыс өз алдына шаңырақ көтергелі әрбір әріптесіміз өңірдің дамуына өзінше үн қосып келеді. Осындай қолдаулар әрбір журналисті қанаттандырады, – деді ол.
«Jetіsý» газеті сапынан фототілші Жұмабай Мұсабеков ҚР Мәдениет және ақпарат министрлігінің Құрмет грамотасын иеленсе, басылымның жауапты хатшысы Еңлік Кенебай, бөлім редакторы Айдар Қалиев Жетісу облысы әкімінің Құрмет грамотасымен, бөлім редакторы Асыл Сұлтанғазы облыс әкімінің алғыс хаты мен марапатталды. Ал, «Jetіsý» газетінің сайт редакторы Қозыбай Құрман «Құлагер» байқауында «Үздік мақала» номинациясы бойынша жеңімпаз атанды.
Дастанбек САДЫҚ
