Тіл сарайында облыстық мәслихат депутаттарының қатысуымен тексеру комиссиясының кезекті отырысы өтті.
Онда Сарқан ауданының жергілікті бюджет қаражатын жоспарлау мен атқарылуының тиімділігіне жүргізілген аудиторлық іс-шараның қорытындысы қаралды. Осы бойынша тексеру комиссиясының мүшесі Қанат Манамұратовтың баяндамасы тыңдалып, тексеру комиссиясына наурыз-сәуір айларында Сарқан ауданының 10 мемлекеттік мекемесінде мемлекеттік аудит жүргізіліп, 2 млрд. 832 млн. теңге заң бұзушылықтың анықталғаны жеткізілді.
Аудит барысында 842,8 млн. теңге қаржылық заң бұзушылық, 1,38 млрд. теңге қаражатты тиімсіз пайдалану, 611,1 млн. теңге қаражатты тиімсіз жоспарлау жағдайы тіркелген. Сонымен бірге құжатсыз жұмыстар, негізсіз төлемдер, бақылаусыз жобалар, жосықсыз мердігерлерге аванстық төлемдер мен бухгалтерлік есептің бұрмалануы секілді фактілер жиі кездескен.
Мысалы, құрылыс саласында 154,9 млн. теңге сомасында аванс төленіп, бухгалтерлік есепте дебиторлық берешек ретінде көрсетілмеген. «Сарқан су құбыры» ШЖҚ МКК-на баланста жоқ мүлікке 200 млн. теңгеден аса қаражат жұмсалған. Бұған қоса, 12,7 млн. теңге мамандарға төленген көтерме қаражаттар қайтарылмаған.
Тексеру нәтижесінде 729,8 млн. теңге қалпына келтіріліп, 1,2 млн. теңге бюджетке өндірілген. Сондай-ақ, 10-нан аса лауазымды тұлға әкімшілік жауапкершілікке тартылып, оларға 30-дан 100 АЕК-ке дейін айыппұл салынған.
Соңында облыс бойынша тексеру комиссиясы тарапынан бюджет қаражатын жоспарлау мен игеру сапасын арттыру, құрылыс жұмыстарын құжатпен сүйемелдеу және жауапты тұлғалардың жеке жауапкершілігін күшейту ұсынылды.
Айгүл Байжұмақызы
