Қазақстанда халықтың орташа жасы жыл сайын артып келеді. 2024 жылдың басындағы ресми деректерге сүйенсек, еліміздегі тұрғындардың орташа жасы 32,3 жасқа жеткен. Бұл туралы ҚР Стратегиялық жоспарлау және реформалар агенттігінің Ұлттық статистика бюросы мәлімдеді, деп хабарлайды 7-su.kz ақпараттық порталы.
Салыстыра кетсек, соңғы бес жылда бұл көрсеткіш 31,9 жастан 32,3 жасқа дейін өскен.
Ерлер мен әйелдер арасындағы айырмашылық
Статистика көрсеткендей, әйелдердің орташа жасы ерлерге қарағанда едәуір жоғары:
- Ерлер – 30,7 жас
- Әйелдер – 33,9 жас
Өңірлер бойынша көрсеткіштер
Халықтың орташа жасы өңірлер бойынша айтарлықтай ерекшеленеді. Ең жас облыстар мен қалалар:
- Түркістан облысы – 27,7 жас
- Маңғыстау облысы – 27,8 жас
- Шымкент қаласы – 27,8 жас
Ал ең «қартайған» өңірлер:
- Солтүстік Қазақстан облысы – 39,2 жас
- Шығыс Қазақстан облысы – 38,9 жас
- Қостанай облысы – 38 жас
Қала мен ауыл арасындағы айырмашылық
- Қалалықтардың орташа жасы – 32,7 жас
- Ауыл тұрғындарының орташа жасы – 31,7 жас
Мамандардың пікірінше, бұл үрдіс елдегі демографиялық өзгерістерге, туу көрсеткішінің төмендеуіне және өмір сүру ұзақтығының артуына байланысты қалыптасып отыр. Мұндай динамика болашақта зейнеткерлік жасты жоспарлау, еңбек ресурстарын басқару және әлеуметтік саясат салаларында ескерілмек.
