Бұл туралы 7-su.kz ақпараттық порталы Massaget.kz сайтына сілтеме жасап хабарлайды.
Агенттік төрағасы Алмасадам Сәтқалиев пен «Росатом» корпорациясының басшысы Алексей Лихачев арасында өткен кездесуде АЭС жобасын дайындау және іске асыру кезеңдерін айқындайтын индикативті құжаттарға қол қойылды. Бұл құжат тараптар арасындағы стратегиялық ынтымақтастықтың нақты кезеңдерін белгіледі.
Сонымен қатар, «Қазақстандық атом электр станциялары» ЖШС мен «Росатом» құрамындағы инжиниринг компаниясы «Атомстройэкспорт» АҚ арасында Алматы облысының Жамбыл ауданында жобаны іске асыру бойынша ынтымақтастықтың негізгі қағидаттары жөніндегі келісім бекітілді.
2025 жылдың ақпан айында Қазақстан Үкіметі елде АЭС салынатын орынды ресми түрде бекіткен болатын. Премьер-Министр Олжас Бектенов қол қойған қаулыға сәйкес, алғашқы атом электр станциясы Алматы облысы Жамбыл ауданы Үлкен ауылында салынады.
Бұған дейін «Росатом» компаниясы Қазақстандағы алғашқы АЭС құрылысын жүргізетін халықаралық консорциумның жетекшісі ретінде таңдалды. Осылайша, Қазақстанда атом энергетикасын дамытуға бағытталған нақты қадамдар жүзеге асырылып жатыр.
