Алдағы екі жылда Қазақстандағы барлық елді мекендер интернет желісіне қосылады. Бұл туралы ҚР Цифрлық даму, инновациялар және аэроғарыш өнеркәсібі вице-министрі Досжан Мұсалиев Сенат отырысында мәлімдеді, деп хабарлайды «Хабар» арнасы.
Қазіргі таңда ел аумағында 6 мыңнан астам ауыл бар. Соның ішінде 4850 ауыл кең жолақты интернетке қосылған. Алайда 1049 ауыл әлі күнге дейін байланыс аясынан тыс қалып отыр. Бұл елді мекендерде шамамен 200 мыңға жуық адам тұрады.
Аталған мәселені шешу үшін «Қолжетімді интернет» жобасы әзірленіп, оны 2027 жылға дейін жүзеге асыру көзделген. Жоба іске асқан жағдайда ауыл тұрғындары анықтама немесе субсидия алу үшін қалаға баруға мұқтаж болмайды.
«Қазіргі уақытта 3G байланысы бар, бірақ жылдамдығы төмен ауылдардың мәселесін де шешу қарастырылған. Сонымен қатар жол бойындағы мобильді интернет сапасын арттыру үшін кемінде 387 байланыс мұнарасы орнатылады. Бұл мақсатқа шамамен 120 млрд теңге көлемінде инвестиция тарту жоспарланып отыр», – деді вице-министр Досжан Мұсалиев.
