Қазақстанда жоғары білім туралы дипломға апостиль қою мерзімі мен тәртібіне өзгерістер енгізілді, – деп хабарлайды 7-su.kz ақпараттық порталы.
Еліміздің Ғылым және жоғары білім министрінің міндетін атқарушының жаңа бұйрығына сәйкес, шетелде білімді жалғастыру немесе жұмысқа орналасу үшін қажетті апостиль қою қызметі оңтайландырылды. Азаматтар бұл қызметті «электрондық үкімет» порталы арқылы немесе «Азаматтарға арналған үкімет» мемлекеттік корпорациясына тікелей барып ала алады. Негізгі мақсат – құжаттардың түпнұсқалығын растау процесін ашық әрі азаматтарға максималды түрде қолайлы ету.
Өтініш берушілерге қажетті құжаттар тізімі:
-
Арнайы үлгідегі өтініш
-
Жеке басты куәландыратын құжат (немесе цифрлық құжаттар сервисіндегі электрондық нұсқасы)
-
Апостиль қойылатын білім туралы құжаттың түпнұсқасы
-
Мемлекеттік алымның төленгенін растайтын түбіртек
Халыққа қызмет көрсету орталығы (ХҚКО) арқылы жүгінгенде құжаттарды тіркеу 1 жұмыс күн ішінде жүзеге асады. Жоғары оқу орындарынан деректерді тексеру 3 жұмыс күн аралығында цифрлық база арқылы жүргізіледі. Егер ақпарат жүйеде жоқ болса, университетке арнайы сұрау жіберіледі. ЖОО өкілдері 7 жұмыс күн ішінде жауап қайтаруға міндетті. Расталғаннан кейін 4 жұмыс күн ішінде құжатқа апостиль қойылады.
Egov порталы арқылы өткізгенде электрондық өтінім 2 жұмыс күнде тексеріліп, төлем жасауға жолданады. Төлемнен соң базалық тексеру басталады. Порталда құжаттың түпнұсқалығы расталған соң, өтініш иесінің «жеке кабинетіне» хабарлама түседі. Тұтынушы 4 жұмыс күн ішінде дипломның түпнұсқасын өзі орналасқан жердегі ХҚКО филиалына апарып тапсырады. Дайын құжат курьер арқылы жеткізіледі.
Қызметтен бас тартудың негізгі себептері:
-
Ұсынылған құжаттарда бұрмаланған, дұрыс емес мәліметтердің анықталуы
-
Құжаттардың 1961 жылғы Гаага конвенциясының халықаралық талаптарына сай келмеуі
-
Жеке деректерді өңдеуге азаматтың келісім бермеуі
