2025 жылдың алғашқы жартыжылдығында Қазақстанда сауда айналымы 31,4 триллион теңгеге жетті. Бұл туралы Сауда және интеграция министрі Арман Шаққалиев мәлімдеді. Оның айтуынша, сауда көлемі бір жылда 8,4 пайызға артқан. Оның ішінде көтерме сауда 9,2 пайызға, бөлшек сауда 6,6 пайызға өсті, деп хабарлайды 7-su.kz ақпараттық порталы.
Министрдің дерегінше, көтерме саудадағы өсім негізінен негізгі 9 тауардың есебінен қамтамасыз етілген. Олардың қатарында мұнай және мұнай өнімдері, газ, тұрмыстық техника, ұялы телефондар, фармацевтика, машина жасау өнімдері, астық және темекі бар. Жыл соңына дейін бұл тауарлар бойынша сатылым көлемі 26,4 триллион теңгеге жетеді деп күтіліп отыр. Бұл көрсеткіш ең алдымен ішкі өндірістің артуы арқылы орындалмақ.
Алты айдың қорытындысы бойынша елдің барлық өңірлері сауда өсімін көрсеткен. Тауар айналымының 72 пайызын Алматы, Астана, Шымкент қалалары мен Атырау және Қарағанды облыстары қамтамасыз етіп отыр. Өсу қарқыны бойынша Түркістан, Ақмола және Павлодар облыстары көш бастаған.
Айта кетейік, бүгін Үкімет отырысында 2025 жылғы қаңтар–маусым айларындағы әлеуметтік-экономикалық даму көрсеткіштері мен республикалық бюджеттің орындалу нәтижелері қаралып жатыр. Отырыс аяқталған соң Үкімет басшылығының қатысуымен баспасөз конференциясы өтеді.
