Қазақстанда құқық қорғау жүйесін жетілдіру бағытында ауқымды өзгерістер жүзеге асырыла бастады. Мемлекет басшысы Қасым-Жомарт Тоқаев ішкі істер органдарының қызметін реформалауға бағытталған заңға қол қойды. Бұл туралы 7-su.kz ақпараттық порталы хабарлайды.
Президент қол қойған «Қазақстан Республикасының кейбір заңнамалық актілеріне құқық қорғау қызметін жетілдіру, құқық қорғау органдарының, арнаулы мемлекеттік органдардың, азаматтық қорғау органдарының қызметкерлерін және әскери қызметшілерді тұрғын үймен қамтамасыз ету және әлеуметтік қорғау, ішкі істер органдарының қызметі саласында артық заңнамалық регламенттеуді болдырмау мәселелері бойынша өзгерістер мен толықтырулар енгізу туралы» заңы аясында бірқатар маңызды өзгерістер қабылданды.
Заңнамаға қандай өзгерістер енгізілді?
Жаңа заң аясында келесі заң актілеріне түзетулер енгізілді:
- «Қазақстан Республикасының ішкі істер органдары туралы»
- «Құқық қорғау қызметі туралы»
- «Тұрғын үй қатынастары туралы»
- «Құқық бұзушылықтың алдын алу туралы»
- «Дактилоскопиялық және геномдық тіркеу туралы»
- Және өзге де салалық заңдар
Түзетулердің негізгі бағыттары:
1. Құқық қорғау қызметін жетілдіру
Құқық қорғау органдарының жұмысын тиімді етуге бағытталған. Бұл ретте кадрлық және құрылымдық реформалар жүргізілмек.
2. Қызметкерлердің әлеуметтік қорғалуы
Құқық қорғау органдары, арнаулы мемлекеттік құрылымдар мен әскери қызметкерлердің әлеуметтік мәртебесін арттыру көзделеді. Бұған қызметтік тұрғын үймен қамту, жеңілдіктер мен қосымша кепілдіктер беру шаралары кіреді.
3. Ішкі істер органдары құрылымын оңтайландыру
Мемлекеттік аппаратты бюрократиядан арылту туралы Президент Жарлығын жүзеге асыру мақсатында ІІМ жүйесі нақты міндеттері мен құзыреттері айқындалып, қайта қаралды.
Осы орайда жергілікті полиция қызметі таратылды. Бұл құрылым полиция жұмысының тиімділігін арттыру үшін қайта ұйымдастырылады. Болашақта учаскелік полиция институтын күшейту көзделіп отыр.
4. Қарасораны өнеркәсіптік мақсатта қолдануға рұқсат
Үкіметке құрамында есірткі заттары жоқ қарасора сұрыптарын анықтау және оны өнеркәсіпте өңдеу тәртібін бекіту құзыреті берілді. Бұл ауыл шаруашылығы мен жеңіл өнеркәсіп салаларын дамытуға серпін беруі мүмкін.
Айта кетейік, бұған дейін Мемлекет басшысы учаскелік полицейлердің еңбек өтілін 1 жылды – 1,5 жыл ретінде есептеуді ұсынған болатын. Бұл шара олардың еңбегін ынталандыру мақсатында қарастырылуда.
Құқық қорғау жүйесіне енгізіліп жатқан бұл өзгерістер алдағы уақытта полиция жұмысының сапасын арттыруға және азаматтардың қауіпсіздігін күшейтуге бағытталған.
