Жазда арзан саяхаттап, демалысты тиімді өткізу үшін Stan.kz тілшісі қазақстандықтандарға нұқсаулық әзірледі. Биыл Вьетнам, Түркия, Мысыр елдері сұраныста. Еңбек демалысында саяхаттың ерекше әрі қызық болсын десеңіз мамандар “барқыт маусымды” таңдауға кеңес береді. Осы тұста туристік агенттіктер ең арзан елдер мен оның бағалары туралы айтты.
“Шетелде көп шығын шығармай демаламын десеңіз мамыр мен қыркүйек айын таңдаған дұрыс. Бұл кезеңдер «барқыт маусым» деп аталады, өйткені ауа райы жылы, ал туристердің жаппай ағыны енді ғана басталатын немесе басылған уақыт. Жазғы маусымға арналған ең тиімді бағалар сәуірдің соңы мен мамырдың басына сәйкес келеді. Бұл – оқу жылы әлі аяқталмаған кезең. Бұл уақытта мектеп демалысы әлі басталмағандықтан, демалысқа деген сұраныс айтарлықтай төмен. Сол себепті турлар бағасы маусым, шілде және тамыз сияқты айлармен салыстырғанда 30%-ға дейін арзан болуы мүмкін. Қыркүйек айында да дәл солай. Жазғы демалыс аяқталып, балалар мектепке оралған соң, туристік ағын азаяды, ал бағалар қолжетімді бола түседі”, – дейді компания.
Ал “Fun&Sun Kazakhstan” туристік операторының мамандары қазақстандықтар үшін саяхаттауға ең тиімді маусым күз айлары деп санайды. Нақтырақ айтсақ, қыркүйек және қараша айларында көп шығындалмай, сапалы демалыс өткізуге болады дейді.
“Бұл уақытта турлардың бағасы төмендейді. Әсіресе Қырғызстан, Грузия, Түркия және Мысыр сияқты елдерге саяхат арзанға түседі. Жалп арзан турларды кез келген бағытқа табуға болады. Бәрі туристің талғамына және қалауына байланысты. Ал арзан турларды алдын ала брондасаңыз шынымен тиімді болуы мүмкін. Осылайша, қаражатыңызды 30%-ға дейін үнемдеп, қалаған қонақ үйді, тамақтану түрін және тіпті бөлменің орналасуын таңдай аласыз. Ал «шұғыл турларды» арзанға сатып алсаңыз, әдетте таңдау болмай, орналасқан жер де сіз күткендей жайлы болмай шығуы мүмкін”, – деп ескертті туристік оператор.
Десе де бұл айларда турлардың сапасы басқаларамен салыстырғанда еш кем емес. Айырмашылық тек ауа райы мен сұраныс деңгейінде дейді. Мәселен, мамыр айындағы турлар қызмет көрсету, қонақүйлер мен экскурсиялық бағдарламалар тұрғысынан жазғы маусыммен бірдей, бірақ үш айлық демалыс кезіндегі дүрбелең болмағандықтан бағасы әлдеқайда төмен болады. Сондықтан мамандар егер демалысыңызды сапалы өткізіп, қаражатыңызды үнемдегіңіз келсе — саяхатты мамыр немесе қыркүйек айларына жоспарлауға кеңес береді.
Бұл мезгілде отандастарымыз Түркия, Египет, Грузия және Вьетнам сияқты елдерін қарастырса да болады.
“Жазда Қырғызстан мен Грузияға турлар, әсіресе ерте брондаған жағдайда тиімді. Таиланд тек Паттайя және Пхукет аралымен ғана танымал емес. Сонымен қатар бұл елге ыңғайлы тікелей рейстер де барын ескерген жөн. Жазда мұндағы қонақүйлердің бағасы қыспен салыстырғанда әлдеқайда төмен, ал туристік пакеттердің бағасы 35–45%-ға дейін арзандайды. Яғни, Таиландқа жылы маусымда саяхаттау ерекше тиімді”, – дейді туристік компания.
Тур бағасының төмендеуіне не әсер етеді?
Тур бағасы мынадай жағдайда төмендейді:
- Жаздың басы мен соңғы айыларында төмендейді. Өйткені бұл кезде туристер ағыны азаяды;
- Ауа райының ерекшеліктеріне байланысты арзандайды. Мысалы, Біріккен Араб Әмірліктерінде жазда тым ыстық болады.
- Туроператорлардың акциялары мен чартерлік рейстер кезінде турды арзан бағада алуға болады.
Алайда оқушылардың жазғы демалысы кезінде және адамдар жаппай еңбек демалысқа шыққанда, атап айтқанда шілде-тамыз айларында, тур бағасы айтарлықтай қымбаттайды. Бұл әсіресе Түркия, Египет, Черногория сияқты сұранысқа ие елдерге қатысты.
Турдың бағасы оның сапасына әсер ете ме?
“Арзан турлар көбіне теңіз жағалауынан алысырақ орналасқан 3–4 жұлдызды қонақүйлерді ұсынады. Әдетте, “күйіп кеткелі тұрған” турды сатып алғанда, таңдау шектеулі болады. Ал бұл “турдың құны оның сапасын әрдайым ақтайды” дегенді білдірмейді. Алайда егер арзан қонақүйді алдын ала брондасаңыз, орналасу орны мен қызмет көрсету сапасы бойынша жақсы нұсқалар таңдауға болады. Яғни, турды арзанға алмасаңыз да, ақылға қонымды бағада сатып алу мүмкіндігі бар. Тиімді ұсыныс іздегенде сенімді туроператор мен турагентті дұрыс таңдау маңызды”, – дейді мамандар.
Отбасымен демалатындарға қандай тиімді ұсыныстар қарастырылған?
● Балаларға арналған тегін немесе жеңілдікпен орналастыру ұсынылған арнайы отбасылық пакеттер;
● Тұрақты клиенттерге арналған бонус және жеңілдік бағдарламалары;
● Ерте брондау: 50%-ға дейін жеңілдіктер.
Мамандардың айтуынша, тур бағасының төмендеуі тек туристер ағыны мен сұраныстың азаюымен байланысты емес. Ірі, ауқымды мерекелердің болмауы да тур құнының төмендеуіне ықпал етеді.
2025 жылға ең сұранысқа ие елдер қандай?
Биылғы танымал бағыттар:
- Түркия;
- Мысыр;
- Вьетнам;
- БАӘ.
Сондай-ақ “Fun&Sun Kazakhstan-ның” отбасымен демалытындарға тиімді ұсыныстары бар. Атап айтқанда, 12 жасқа дейінгі балалар үшін тұру тегін және ойын-сауықтарға да тегін кіре алады. Кей жағдайларда балаға тегін әуе билеті де қарастырылған.
