Қазақстанның Сыртқы істер министрлігі Таяу Шығыс елдеріне туристік сапарды жоспарлап отырған азаматтарға сақтық шараларын ұстануға кеңес берді, 7- su.kz ақпараттық порталы.
Министрліктің ресми өкілі Айбек Смадияровтың айтуынша, қазіргі геосаяси жағдай тұрақсыз болғандықтан, мұндай бағыттағы сапарларды алдын ала жан-жақты ойластыру қажет.
Таяу Шығыс елдеріне туристік мақсатпен баруды жоспарлап жүрген азаматтарымызға айтарымыз: қазіргі геосаяси жағдайды ескере отырып, ондай сапарлар туралы жақсылап ойланып, жауапкершілікті өз мойындарыңызға алуларыңызды сұраймыз, – деді ол ведомствода өткен баспасөз мәслихатында.
Сонымен қатар, Смадияров жағдай ушығып кеткен жағдайда Қазақстан азаматтарын елге қайтару – күрделі мәселеге айналуы мүмкін екенін ескертті.
Ертеңгі күні ахуал нашарлап кетсе, эвакуациялау кезінде қиындықтар туындауы мүмкін, – деді министрлік өкілі.
Сыртқы істер министрлігі азаматтарды ресми ақпарат көздерін қадағалап, тәуекелдерді мұқият бағалауға шақырады.
