Күз – тұрғын үй нарығында белсенді кезеңдердің бірі. Әсіресе ірі қалаларда пәтер сатып алу-сату мәмілелері жиілеп, құрылыс қарқыны күшейеді. Алайда 2026 жылдан бастап енгізілетін жаңа салық құрылыс нарығына да, баспана бағасына да әсер етуі мүмкін, деп хабарлайлы 7-su.kz ақпараттық порталы.
Құрылыс компанияларына қосымша құн салығы енгізіледі
2026 жылдан бастап жаңа салынған пәтерлерді сататын құрылыс компаниялары қосымша құн салығы (ҚҚС) ретінде 16% төлеуге міндеттеледі. Сарапшының айтуынша, бұл тұрғын үй бағасын да арттырады.
«2026 жылдан бастап жаңа салық кодексі күшіне енеді. Жаңа салынған үйлерге қосымша құн салығы 16% болады. Сондықтан пайдалануға берілетін пәтерлердің базалық бағасы да шамамен 16%-ға өседі деп күтуге болады», – дейді Айбар Олжай.
Шағын компаниялар нарықтан кетуі мүмкін
Сарапшы жаңа салықтың әсіресе шағын құрылыс компанияларына ауыр соғатынын айтты.
«Бағаның төмендеуі екіталай. Керісінше, жаңа және қолданыстағы пәтерлердің бағасы өседі. Себебі кіші құрылыс компаниялардың көбі нарықтан кетуі мүмкін. Ал ірі құрылысшылар бағаны одан әрі көтереді. Сонымен қатар, ірі қалаларда құрылыс қарқыны бәсеңдеуі де ықтимал», – дейді ол.
Ипотека да бағаның өсуіне әсер етеді
Қазіргі таңда елде баспана алуға арналған түрлі ипотекалық бағдарламалар бар: мемлекеттік, коммерциялық банктердің ұсыныстары және құрылыс компанияларының бөліп төлеу жүйелері.
Айбар Олжайдың сөзінше, арзан және қолжетімді ипотека да сұранысты арттырып, бағаны өсіреді.
«Арзан ипотека сұранысты күрт арттырады. Құрылыс компаниялары сұраныс көбейген сайын бағаны көтере бастайды. Бұл заңдылық: ипотека қолжетімді болған сайын, тұрғын үй бағасы да қымбаттай түседі», – дейді экономист.
2026 жылдан бастап енгізілетін жаңа салық пен қолжетімді ипотекалық бағдарламалар бағаның төмендеуіне емес, керісінше өсуіне себеп болуы мүмкін. Сарапшылардың пікірінше, тұрғын үй нарығында алдағы жылдары да баға өсімі жалғасады.
