Балпық би ауылында салынып жатқан екі 60 пәтерлі және бір 20 пәтерлі көпқабатты тұрғын үйлердің құрылысы, ауылішілік кәріз тазарту жүйесінің құрылысы, қоғамдық және тұрғын үйлерді жылумен қамтамасыз етуге бағытталған блокты-модульді қазандық нысаны, Мәмбет ауылындағы жаңадан бой көтеріп жатқан тұрғын үй массивіне электр желісін тарту жұмыстары назарға алынды.
Аудан басшысы құрылыс сапасына, белгіленген мерзімдердің сақталуына және техникалық талаптардың орындалуына айрықша мән беріп, мердігер мекемелерге нақты тапсырмалар жүктеді. Сонымен қатар, құрылыс материалдарының сапасы мен жұмысшылардың қауіпсіздік талаптарына сай еңбек етуі де басты назарда болу қажеттігі айтылды.
– Бұл – ел игілігі үшін қолға алынған ірі жобалар. Әлеуметтік нысандардың құрылысы аудан тұрғындарының әл-ауқатын арттыруға тікелей әсер ететін маңызды сала. Сондықтан әр жұмыс сапалы әрі уақытылы атқарылуы тиіс, – деді аудан әкімі.
Айта кетейік, аталған жобаның барлығы тұрғын үймен қамту, инженерлік инфрақұрылымды жақсарту, жайлы өмір сүру стандарттарын енгізу сынды стратегиялық мақсаттарға бағытталған. Аудан әкімдігі тарапынан барлық нысан тұрақты бақылауға алынған.
Аружан ЖАҚЫП
