Менің ойымша, Қазақстан мен Қытай арасындағы сауда-экономикалық қарым-қатынастың қазіргі деңгейі — екі ел арасындағы сенімді серіктестіктің айқын көрсеткіші. 2024 жылы екіжақты сауда көлемінің 30 миллиард долларға жетуі бұл жай ғана статистика емес, нақты нәтиже. Бұл қазақстандық өнімдерге деген сұраныстың артып келе жатқанын, ал еліміздің Азия бағытындағы экономикалық беделі өсіп келе жатқанын білдіреді.
Әсіресе ауыл шаруашылығы саласындағы серіктестікке назар аударғым келеді. Бұл салада нақты өсім бар, және Қытай тарапынан шынайы қызығушылық байқалады. 1,1 миллиард долларлық қазақстандық экспорт — бұл тек сан емес, бұл ауылдағы еңбек адамдарының, фермерлердің маңдай тері мен еңбегінің халықаралық деңгейде бағалануы.
Маған Dalian Hesheng Holding Group компаниясының 650 миллион долларлық зауыты ерекше әсер қалдырды. Мұндай жобалар еліміз үшін өте маңызды: олар жаңа жұмыс орындарын ашып қана қоймай, отандық өнімдерді қайта өңдеп, шетел нарығына шығару мүмкіндігін береді. Бұл қосылған құны жоғары өнімдер арқылы экономиканы әртараптандырудың нақты мысалы.
Жалпы алғанда, мен Қазақстан мен Қытай арасындағы бұл тұрақты экономикалық байланыстарды екі елдің ұзақ мерзімді және өзара тиімді әріптестігінің негізі деп білемін. Мұндай жобалар мен көрсеткіштер тек бүгінгі күнге емес, болашақ ұрпақ үшін де берік негіз қалайды деп сенемін.
Мөлдір Ибраимова,
«Демеу» орталығының психологі
