Қытайдың Қазақстан экономикасына инвестиция салуы – бұл жай қаржылық қолдау емес, бұл екі ел арасындағы сенімді және ұзақ мерзімді әріптестіктің көрінісі. Қытай бүгінде біздің экономикадағы ең ірі инвесторлардың бестігіне кіреді, ал 26 миллиард доллар көлеміндегі капитал салымы – бұл аз көрсеткіш емес. Бұл қаржы тек қағаз жүзіндегі сандар емес, нақты жобалар, жұмыс орындары мен өндірістік қуаттар.
Маған әсіресе 12,8 мың жұмыс орны құрылған 63 жоба мен алдағы уақытта 14,6 миллиард долларға іске асырылатын жаңа 59 жоба әсер қалдырды. Бұл тек Астана мен Алматыда ғана емес, еліміздің түрлі аймақтарында жұмыс орындарының ашылып жатқанын білдіреді. Яғни, инвестициялар нақты адамдардың өмір сапасына әсер етіп жатыр.
Сонымен қатар, жобалардың тек шикізат емес, қайта өңдеу және өнеркәсіп салаларына бағытталуы мені қуантады. Бұл – Қазақстанның экономиканы әртараптандыру, яғни шикізатқа тәуелді болмай, қосылған құны жоғары өнім шығару бағытын ұстанып отырғанын көрсетеді. Бұл біз үшін – болашаққа жол.
Ал Қытайдың «Бір белдеу – бір жол» бастамасы шеңберіндегі ынтымақтастық Қазақстанға үлкен мүмкіндіктер ашып жатыр. Елдің транзиттік әлеуеті артып, біз Азия мен Еуропаны байланыстыратын маңызды көлік торабына айналудамыз. Қорғас, Алтынкөл, халықаралық автожолдар – мұның бәрі ел инфрақұрылымын жаңа деңгейге көтеріп жатыр.
Қорыта айтқанда, мен Қытаймен экономикалық әріптестікті Қазақстан үшін үлкен мүмкіндік деп санаймын. Ең бастысы – бұл қарым-қатынастан қарапайым халық нақты пайда көріп отыр.
Жайық Тазабекұлы,
Жетісу университетінің «Рухани жаңғыру» ғылыми-білім беру орталығының директоры
