Шаһар басшысымен кездесуде өңір тұрғындары бүгінде ауыл-аймақты дамыту бағытында атқарылып жатқан жұмыстар аз емес екенін айта келіп, бірқатар өтініштерін жеткізді. Осы орайда олар Қызылтастағы жол инфрақұрылымын жақсарту, түнгі жарық, ауыз су, газ желілерін тарту, балалар ойын алаңын салу туралы өзекті мәселелерді алға тартты.
Тұрғындар қойған әр сауалды мұқият тыңдап, нақты жауап берген қала әкімі биыл Қызыл тас саяжайында жүзеге асатын тың жобалармен бөлісті. Ернат Дүйсенбекұлының сөзінше, 2025 жылы аталған саяжайында 2,8 шақырымдық жаңа жол салынып, 17 шақырым аумаққа түнгі жарық желісін тарту көзделген. Сондай-ақ, заман талабына сай жабдықталған балалар ойын алаңының құрылысы басталып, таяу мезгілде пайдалануға беріледі деп күтілуде.
– Қызылтас саяжайының жалпы тұрғындары сіздер көтеріп отырған жол, түнгі жарық, газ тарту сияқты өзекті мәселелер кезең-кезегімен жүйелі түрде оң шешімін табады. Биылдың өзінде бұл елдімекендегі 4 көшеге асфальт жабындысы төселсе, келер жылы тағы 4 көшені ретке келтіру жоспарланып отыр. Сонымен қатар, мұндағы өзге де мәселелер біздің тұрақты бақылауымызда болады, — деді шаһар басшысы.
Еске салсақ, көп жылдан бері өзекті болып келген ауыз су мәселесі де оң шешімін тауып, тұрғындар толыққанды таза ауыз сумен қамтылған.
Айдын КӘЛІМХАН
