Кейде желдің екпінімен ұшып кетердей болып, енді бірде жаңбыр жауса әр жерінен бір су ағып мазаны кетірген төбедегі шатырларға жөндеу керек-ақ. Талдықорғандағы тұрғындар тарапынан үйдің шатыры жөнінде көп сөз қозғалып, әкіммен жолықса мәселе есебінде алға тартатын. Алдағы уақытта облыс орталығындағы бірқатар үйдің шатыры жаңартылып, қасбеті жөндеуден өтеді.
Талдықорған әкімдігінің баспасөз қызметінің ақпарынша, биыл 39 көпқабатты тұрғын үйдің шатыры жаңартылып, 20 үйдің қасбеті жөнделеді. Бүгінде бұл жұмыстар қарқынды түрде басталып, қызу жүргізілуде. Облыс орталығы Талдықорғанда 800-ден астам көпқабатты тұрғын үй бар. Олардың басым бөлігі 1970-80 жылдары салынған.
Қазіргі уақытта көптеген үйдің шатыр жабындысы мен қасбеті тозып, жаңартуды қажет етуде. Осыған орай қала әкімінің тапсырмасына сәйкес қала аумағында жыл сайын тозығы жеткен тұрғын үйлерді күрделі жөндеу жұмыстары жоспарлы түрде жүргізіліп келеді.
Бұл жұмыстар тұрғындардың қауіпсіздігін қамтамасыз етіп, өмір сапасын арттырып және қала келбетін жақсарту мақсатында жүргізіліп жатыр. Былтыр 28 үйдің шатыры жаңартылып, 11 үйдің қасбеті ретке келтірілген еді. Одан бөлек, әр үйдің ауласы да кезеңімен абаттандырылып, заман талабына сай реттеліп жатыр.
Серік ҚАНТАЙ
