Жетісу облысы бойынша Халыққа қызмет көрсету орталығында мектеп оқушыларына арналған цифрлық сауаттылық пен қауіпсіздікке бағытталған «Кибер Тұмар» атты ашық есік күн өтті. Іс-шара Балаларды қорғау күніне орай ұйымдастырылған республикалық «Қазақстан балалары» акциясының бір бөлігі болды.
Іс-шара барысында оқушылар Халыққа қызмет көрсету орталығының жұмысымен танысып, өздігінен қызмет алу секторында онлайн қызметтерді қалай алу керектігін үйренді. Сондай-ақ, оларға «ЦОН» мобильді қосымшасының мүмкіндіктері таныстырылып, электрондық цифрлық қолтаңба (ЭЦҚ) туралы түсіндірілді.
Киберқауіпсіздікке ерекше назар аударылды: балалар өз жеке деректерін қалай қорғау керектігін және интернетте қауіпсіз болу үшін мықты құпиясөздерді неге қолдану маңызды екенін білді.
Іс-шара соңында барлық қатысушылар Мемлекеттік корпорацияның қызметі мен интернеттегі қауіпсіз мінез-құлықтың негіздеріне арналған шолу курсын өткенін растайтын сертификаттар алды.
Айта кетейік, бұл іс-шара Қазақстан Республикасының Цифрлық даму, инновациялар және аэроғарыш өнеркәсібі министрлігінің қолдауымен өткізілді.
