Мамандардың мәліметінше, бұл жобалар негізінен қаладағы шағын және орта кәсіпкерлікті дамытуға, аймақтағы жұмыссыздық дейгейін азайтуға, сондай-ақ, жаңа жұмыс орындарын құруға, жергілікті халықтың сұранысына сай қызмет көрсету сапасын арттырып, өңірлік өнім өндіруге бағытталған. Осы жолғы берілген гранттар бойынша өтінімдер мамыр айының 21 күнінен 3-ші маусым аралығында қабылданып, нәтижесінде үздік деп танылған 15 кәсіпкерлік жобаға 23 милиион теңгеден астам қаржылай қолдау көрсетілген. Аталған грант – бастапқы кезеңде кәсіп ашуға ниетті азаматтар үшін үлкен мүмкіндік. Оның басты ерекшелігі — берілген қаражатты кейін қайтару міндеті жоқ. Нақтырақ айтқанда, берілген қаражат толықтай кәсіпкердің идеясын жүзеге асыруға жұмсалады. Басты талап – ұсынылған жоба нақты, жүзеге асуға қабілетті және әлеуметтік-экономикалық пайда әкелетіндей болуы шарт.
– Ал, қайтарымсыз қаржыға үміткерлердің кәсіп бастау жобаларын арнайы құрылған комиссия жан-жақты талдап, сараптап, нақты шешімдер қабылдайды. Мәселен, бұл жолы тұрмыстық техникалар мен көлік жөндеу қызметтері, азық-түлік өндірісі, сән және медицина, қолөнер сынды 15 жоба қолдау тауып, тиісті қаражатқа ие болып отыр, –дейді сала басшылары.
Еске сала кетсек, өткен жылы Талдықорған қаласы бойынша 30 азамат кәсіпкерлікті дамыту мақсатындағы мемлекеттік грантқа ие болған. Биыл 70-ке жуық өтінім қабылданып, олардың біразы комиссия шешімімен қайтарымсыз грант алуда. Мұндай жобаларға қолдау алдағы уақытта да жалғаспақ.
Айдын КӘЛІМХАН
