Осы орайда Талдықорған қаласының әкімі Ернат Бәзіл шаһардағы үздік оқу орындарының бірі Ш.Уәлиханов атындағы №10 мектеп-гимназиясына арнайы барып жас түлектерді жүрекжарды қуанышымен құттықтап, жаңа өмірге басқан қадамына сәттілік тіледі.
– Сіздер еліміздің ертеңі, ұлтымыздың болашағысыздар. Әрқайсыңыздың арманыңыз биік, алға қойған мақсатыңыз айқын. Сол мақсатқа жету жолында табандылық пен ізгі ізденіс қажет. Білім баға жетпес қазына, оны ешкім тартып ала алмайды. Жас түлек ретінде өз жолыңызды дұрыс таңдап, еліңізге, туған жеріңізге адал азамат болуларыңызға тілектеспін», – деді қала әкімі.
Сала басшыларының сөзінше, Талдықорғандағы Шоқан Уәлиханов атындағы бұл гимназияда бүгінде 1576 оқушы білім алуда. Биыл 69 түлек алтын ұя мектебімен қоштасып, үлкен өмір табалдырығын аттады. Олардың үшеуі — «Алтын белгі», бесеуі — үздік аттестат иегері. Түлектер болашақта түрлі мамандық иесі болуға ниетті. Аталған білім ордасының оқушылары тек оқу озаттары ғана емес, спорт пен өнер салаларында да түрлі жетістіктерге жетіп, қала абыройын асқақтатып жүрген үздіктер.
Мамандардың мәліметінше, биыл Жетісу облысының орталығында 35 мыңнан астам оқушы білім алса, оның 1446-сы мектеп бітірушілер. Соның ішінде 45 оқушы «Алтын белгі», 68 түлек үздік аттестат иегері атанған. Сонымен қатар, 2024–2025 оқу жылында 3720 бүлдіршін алғаш мектеп табалдырығын аттаған.
Айдын КӘЛІМХАН
