Нақты дерек көздеріне жүгінсек, соңғы 10 жылда Талдықорған қаласы бойынша 300-ге жуық көпқабатты тұрғын үйлердің аумағындағы 200-ден астам аула жаңартылған.
Қала әкімдігінің баспасөз қызметінің мәліметінше, өткен жылы қаладағы «Ұлан» шағын аумағында 5 аула ретке келтірілсе, Еркін ауылында 2 аулаға жөндеу жұмыстары жүргізілген. Сонымен қатар, «Халық қатысатын бюджет» бағдарламасы аясында Батыс тұрғын алабындағы Жазиралы мен Ақындар көшелерінің қиылысында, сондай-ақ аймақтағы Ащыбұлақ, Алмалы, Үйтас және Көктем саяжайларында стрит-воркаут кешені мен балалар ойын алаңдары салынған. Мұндай жұмыстар биыл да жалғасып аймақта 59 аула ел игілігіне берілмек. Атап айтқанда, облыс орталығындағы «Жұлдыз» шағын ауданында 18 аула, «Жетісу» шағын ауданында 11 аула және «Ұлан» шағын ауданында 9 аула абаттандырылады. Сонымен қатар «Халық қатысатын бюджет» бағдарламасы аясында тағы 20 аулаға спорттық жаттығу және балалар ойын алаңдары салынбақ.
– Біздің Талдықорған қаласында тұрғанымызға 40 жылға жуықтады. Осы уақыт ішінде бұрын біз мұндай бір де бір ауланың реттеліп, жөнделгенін көргеніміз жоқ. Кейінгі жылдары қаламыз дамып, облыс және қала әкімдері ауқымды жұмыстар атқарып жатыр. Енді, міне, аулаларды ретке келтіріп, есіктің алдына шықсаң балалар ойнайтын және оларға қарайтын үлкендер демалатын жақсы орындар салынуда. Сол үшін біз басшыларға, бұларды салып жатқан құрылысшыларға ризамыз. Тек алғысымызды жеткіземіз», – дейді қала тұрғыны Бағдагүл Айтанова.
Айдын КӘЛІМХАН
