Алдын ала мәліметке сәйкес, жасөспірім сабағынан шығып, үйіне қайтып бара жатқан сәтінде жаяу жүргіншілер өткелінде қалалық автобус жүргізушісінің қағуы салдарынан оқиға орнында жан тапсырған.
Бұл туралы Жетісу облыстық Полиция департаментінің баспасөз хатшысы Жанар Қалықова мәлім етті:
«Алдын ала дерек бойынша, автобус жүргізушісі жаяу жүргіншілер өткелінде кәмелетке толмаған баланы қағып кеткен. Жол-көлік оқиғасының салдарынан жаяу жүргінші сол жерде көз жұмды. Қазіргі уақытта тергеу амалдары басталды, жүргізуші қамауға алынды», – деді Қалықова.
Қауіпсіздік ескерілмеген бе?
Тұрғындардың айтуынша, дәл осы қиылыста ұзақ уақыт бойы жөндеу жұмыстары жүріп жатыр. Олар бұл жерді «жаяу жүргіншілер үшін аса қауіпті аймақ» деп атап, тиісті органдарға бірнеше рет шағымданғандарын айтады.
«Абай мен Қабанбай батыр көшелері қиылысында жарық шамдары дұрыс істемейді, жол белгісі де жетіспейді. Балаларымызды сабаққа жіберуге қорқамыз», – дейді оқиға орнына жиналған қала тұрғындары.
Қазір аталған дерек бойынша Қылмыстық кодекстің тиісті бабы бойынша іс қозғалып, тергеу жалғасуда. Оқиғаның мән-жайы анықталып жатыр.
