Қала әкімдігінің қолдауымен «Спорт – есірткіге қарсы» акциясы аясында өткен спорттық шараға жалпы 200-ге жуық адам қатысты. Жиналған жұрт алдында сөз алған шаһар басшысы таңғы велошеруге қатысуға келген барша қауымға сәттілік тілеп, ізгі тілегін жеткізді. Сондай-ақ, ол бұқаралық спортпен тұрақты түрде айналысып жүрген әрбір жанға алғыс білдіріп, мұндай игі шаралардың бұдан былай да жалғасатынын атап өтті.
Ұйымдастырушылардың сөзінше, шараның басты мақсаты – жұртқа салауатты өмір салтын ұстануды кеңінен дәріптеп, бұқаралық спортты қолдау. Талдықорғандағы орталық алаңнан бастау алған 12 шақырымдық велошеру қайта сол маңда түйінделді. Таңғы шараға қатысушылар арасында аймақтағы кәсіби велосипедшілер, мемлекеттік қызметкерлер және белсенді қала тұрғындары бар. Шара барсында шеруге қатысушылар арасында лоторея ойындары ойнатылып, жеңімпаздарға бағалы сыйлықтар табысталды.
Еске сала кетсек, облыс орталығында мұндай велошеру қала әкімінің қатысуымен осымен бесінші мәрте ұйымдастырылып отыр.
Айдын КӘЛІМХАН
