Талдықорған қаласында елдік пен спортты үндестірген ауқымды велошеру ұйымдастырылды. Іс-шара Қазақстан Республикасының Мемлекеттік рәміздер күніне және «Динамо» дене шынықтыру-спорт қоғамының 100 жылдық мерейтойына арналды.
Жетісу облысы полиция департаментінің 70-тен астам қызметкері қатысқан бұл велошеру — патриотизмді, салауатты өмір салтын және ұлттық рәміздерге деген құрметті насихаттаудың жарқын үлгісі болды. Қатысушылар қала көшелерімен жүріп өтіп, спорттық серпінмен қатар мемлекеттік рәміздерге деген айрықша құрметтерін көрсетті.
Ұйымдастырушылардың айтуынша, велошерудің басты мақсаты — күштік құрылымдар арасындағы ынтымақтастықты нығайту, азаматтық рухты ояту және жастарға үлгі болу. Бұл бастама қоғам денсаулығын жақсарту, белсенді өмір салтын қолдау және ұлттық құндылықтарға деген құрметті арттыруға бағытталған.
«Динамо» спорт қоғамы өзінің ғасырлық тарихында құқық қорғау органдары қызметкерлерінің дене дайындығы мен спорттық әлеуетін арттыруда елеулі рөл атқарып келеді. Ал іс-шараның дәл Мемлекеттік рәміздер күнімен тұспа-тұс өтуі — ұлттық нышандарға деген терең құрметтің көрінісі.
Мерекелік велошеру — «Динамо» қоғамының мерейтойына арналған кең ауқымды іс-шаралар легінің бір бөлшегі болды. Қала тұрғындары мен қатысушылар шараны жоғары бағалап, оның спорт пен отансүйгіштікті ұштастырған ерекше маңызын атап өтті.
«Жетісу-Ақпарат»
